![](https://albanianpost.com/wp-content/uploads/2023/12/vjosa-osmani-2.png)
Presidentja e Kosovës, Vjosa Osmani, në Këshillin për Demokraci dhe të Drejtat e Njeriut, ka deklaruar se në Veriun e Kosovës asnjëherë s’ka pasur prezencë më të madhe të institucioneve të sigurisë në këtë pjesë.
Ajo ka theksuar se këtë e ka parë vetë gjatë vizitave të saj në Veri, por që dëshmi është edhe puna e institucioneve.
“Kosova asnjëherë s’ka pasur prezencë më të madhe në Veri të Kosovës, po flasë për institucionet tona të sigurisë unë së bashku me ministrin kemi dalur disa herë prezenca është jo vetëm fizik, por është prezencë që ju jep siguri qytetarëve pavarësisht nacionalitetit të tyre”.
Osmani, ka konsideruar se regjistrimi i makinave në pjesën e Veriut nga targat ilegale në RKS, tregon për punën e bërë në këtë drejtim.
“Vetë suksesi në regjistrimin e makinave të tyre me targa të RKS-së dhe po ashtu marrja e pasaportave është një dëshmi e kësaj prezence të institucioneve të Republikës së Kosovës në Veriun e vendit dhe vetëm do të vazhdojmë t’i përkrahim vendimet e institucioneve në veçanti të ministrisë së Punëve të Brendshme”, tha Osmani.
![](https://albanianpost.com/wp-content/uploads/2023/12/2-2.png)
Ndërsa, ka pohuar se Komisioni Qendror i Zgjedhjeve për zgjedhjet e reja në Veri duhet të veprojnë në përputhje me ligjet dhe Kushtetutën e Kosovës.
“Natyrisht KQZ-ja tashmë do të ketë përpara një detyrë të rëndësishme në përputhje me udhëzimin administrativ sa i përket zgjedhjeve dhe do ta ketë përkrahjen tonë të plotë në mënyrë që të gjitha të plotësohen në përputhje me ligjet dhe Kushtetutën e Kosovës”.
Në një pjesë të fjalimit të saj, Osmani ka folur edhe për ligjet e Kosovës duke deklaruar se ligjet që nuk janë në përputhje me ligjin për barazi gjinore do të ndryshohen.
“Grupi për barazi gjinore i këtij këshilli është takuar vazhdimisht gjatë vitit që kemi lënë pas dhe me ndihmën e prej shumë juve janë identifikuar të gjitha ligjet e Republikës së Kosovës që duhet të ndryshohen në mënyrë që të jenë në përputhshmëri të plotë me ligjin për barazi gjinore”.
“Po shohim vendet e rajonit që është duke u shqyrtuar përfshirja e femicidit si vepër e veçantë penale ne jemi në diskutime me ministrin e Drejtësisë për këtë. Ky fenomen për fat të keq nuk është duke shkuar duke u eliminuar dhe ne duhet të shkojmë duke ashpërsuar dënimet dhe duke marrë masa shtesë”.
Ndryshe sa i përket targave në Veri, mijëra serbë të Kosovës i kanë regjistruar automjetet, duke hequr dorë nga targat ilegale serbe, derisa numri i qytetarëve serbë që kanë zgjedhur t’i konvertojnë targat nga ilegalet në RKS (Republika e Kosovës), ka shkuar në mbi 4 mijë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com