![](https://albanianpost.com/wp-content/uploads/2023/12/1200-630-1693383366xdacic-gervalla-770x442-937.jpg)
Ministrja e Punëve të Jashtme të Kosovës, Donika Gërvalla, ka folur për prapaskenat e seancës së Këshillit të Sigurimit të Organizatës së Kombeve të Bashkuara ku në prill të këtij viti ishte diskutuar për raportin gjashtëmujor për Kosovën.
Duke shpjeguar situatën në atë seancë, Gërvalla e ka quajtur ministrin e Punëve të Jashtme të Serbisë, Iviça Daçiç-in, rrugaç, meqë ky i fundit, sipas Gërvallës, ka bërtitur e lëshuar fjalë të pista, ndërkohë që kryediplomatja kosovare mbante fjalimin e saj para ambasadorëve.
“Nuk lenin gjë pa na thonë, Daçiç-i gjithë kohën bërtiste serbisht thoshte ‘sa keq sa keq që nuk jemi në Serbi’”, ka pohuar ajo në një intervistë për Televizionin A.
Sipas Gërvallës, pas mbarimit të seancës, Daçiç së bashku me ekipin e tij ka dashur edhe të konfrontohet fizikisht me delegacionin nga Kosova.
“Ne pasi e kryem pjesën zyrtare, unë me qëllim qëndrova pak ma gjatë sepse nuk doja të ballafaqoja me Daçiç-in në atë farë korridori, mirëpo ata erdhën ishte ambasadori i Serbisë në Shtetet e Bashkuara të Amerikës në Serbi, Marko Gjuriç, ishte përfaqësuesi i tyre në New York dhe erdhën dhe na u afruan dhe donin të konfrontoheshin fizikisht me ekipin. Donin si rrugaçët me shpatulla të na binin”, ka shtuar ajo.
Pas këtij aksidenti në tentativë, Gërvalla, ka bërë të ditur se rasti është regjistruar zyrtarisht edhe në Këshillin e Sigurimit.
“Janë shikuar me kujdes të gjitha videot dhe është bërë protokollimi i asaj situate”.
Pas shpjegimit të një situate jo të lakmueshme, kryediplomatja kosovare ka potencuar se Qeveria e Kosovës, aktualisht, po përballet me një strukturë jo politike në Serbi.
“Prandaj është kaq i vështirë ky proces sepse kemi të bëjmë pjesërisht me rrugaçë dhe kemi të bëjmë me kriminelë nga e kaluara. Do të mbetet sfiduese dhe e vështirë gjetja e një zgjidhje me Serbinë, por ne nuk kemi tjetër alternativë përveçse të vazhdojmë përpjekjet tona pa bërë kompromise të dëmshme aty ku nuk duhet të bëjmë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com