Krasniqi, familjes së Isni Kilajt: Tendencat për ta njollosur atë dhe çlirimtarët tanë nuk do të kenë sukses
![](https://albanianpost.com/wp-content/uploads/2023/11/397132222_880353470112927_4189971547134894064_n.jpg)
Kryetari i Partisë Demokratike të Kosovës, Memli Krasniqi, të hënën ka vizituar familjen e Isni Kilajt i cili është duke u mbajtur në paraburgim nga Gjykata Speciale që nga 2 nëntori.
Krasniqi, në këtë takim ka thënë se drejtësia do të triumfojë, ndërsa liria popullit të Kosovës nuk i është falur.
“Liria, popullit tonë nuk i është falur, por është fituar me gjak e sakrificë, andaj lufta e Ushtrisë Çlirimtare të Kosovës ka qenë e pashmangshme, por edhe e pastër. Tendencat për ta njollosur atë dhe çlirimtarët tanë – nuk do të kenë sukses”, ka thënë ai.
“Drejtësia do të triumfojë!”.
Dhomat e Specializuara të Kosovës (DHSK) në Hagë të Holandës kanë marrë vendim për vazhdimin e paraburgimt ndaj ish-kryetarit të Malishevës, Isni Kilaj, i cili akuzohet për vepra penale që përfshijnë pengimin e personave zyrtarë në kryerjen e detyrave zyrtare dhe shkeljen e sekretit të procedurave në gjyqin kundër ish-eprorëve të Ushtrisë Çlirimtare të Kosovës (UÇK).
Në një dokument të publikuar të hënën, thuhet se është aprovuar kërkesa e DHSK-së për vazhdim të paraburgimit ndaj ish-komandantit të UÇK-së, i cili është arrestuar të premten, kurse paraqitja e tij e parë para DHSK-së për t’u informuar për arsyet e arrestimit ishte caktuar për të shtunën.
Zyra e Prokurorit të Specializuar (ZPS) ka bërë të ditur se Kilaj është ngarkuar me vepra penale në të cilat përfshihet pengimi i personave zyrtarë në kryerjen e detyrave zyrtare sipas Kodit Penal të Kosovës dhe shkelja e sekretit të procedurave dhe Ligjit për DHKS-në e ZPS-në.
Java e kaluar është karakterizuar me disa aksione të ZPS-së në Kosovë. Misioni i Bashkimit Evropian për Sundim të Ligjit (EULEX) nën asistencën e Policisë së Kosovës, ka bastisur shtëpinë e Ismail Sylës, Artan Behramit, Blerim Shalës dhe Bashkim Smakës, të cilët kanë shërbyer në ekipin këshilldhënës të Hashim Thaçit, ish-presidentit të Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com