![](https://albanianpost.com/wp-content/uploads/2023/09/vajza-e-afrim-bunjakut-1536x1152-1.jpg)
Vajza e policit të vrarë të dielën në Veri, Afërdita Bunjaku, në fjalimin e saj në mbledhjen komertatitve për nder të policit, Afrim Bunjaku ka thënë se ndjehet krenare për heroizmin e babait të saj.
“Heroi im, babi im, sa vështirë e kam të shkruaj për ty babi. Para kohe mbeta jetime, ikja jote na la plagë të madhe në zemrat tona”, u shpreh vajza e policit të ndjerë.
Ajo më tej shtoi se “nuk e di si të jetoj pa ty”.
Bunjaku, nga të gjitha mësimet që tha se i ka marrë nga i ati, ka thënë se atë se si të jetojnë pa të nuk e mësuan.
“Hyra brenda në shtëpi dhe nuk të pash, është shumë e rëndë për mua. Të gjitha na i mësove por asnjëherë sesi të jetojmë pa ty. Flijove jetën për liri për këtë vend që ne dhe Kosova të gjithë të jemi krenarë me ty dhe heroizmin tënd”, deklaroi ajo.
![](https://albanianpost.com/wp-content/uploads/2023/09/9852-1.png)
Në fund të fjalës, ajo i dha edhe një premtim babait të ndjerë.
“Të premtoj që do të jem gjithmonë krenare me ty dhe do të ndjekim gjithmonë rrugën tënde. Me mall dhe dhimbje do të përkujtojmë gjithmonë”.
Më 25 shtator, një pjesëtar i Policisë së Kosovës u vra, një u plagos dhe një tjetër u lëndua, pas një sulmi terrorist nga persona të armatosur në Banjskë të Zveçanit, rreth orës 3 të mëngjesit të së dielës.
Organet e rendit konfirmuan se katër sulmues janë vrarë dhe gjashtë të tjerë janë arrestuar, dy prej tyre të uniformuar dhe katër të tjerë që ndihmonin në operacion përmes radiolidhjeve.
Derisa pjesëtarët e tjerë të grupit terrorist dyshohet se janë arratisur duke kaluar në territorin e Serbisë.
Policia e Kosovës është duke vazhduar operacionin edhe gjatë së hënës.
Sipas informacioneve të fundit, Policia ka gjetur prova të reja, pajisje e materiale që janë konfiskuar në orët e fundit nga vendi i ngjarjes në të cilin për orë të tëra gjatë ditës së djeshme pati shkëmbime me armë zjarri.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com