![](https://albanianpost.com/wp-content/uploads/2023/09/Petkovic.jpg)
Drejtori i të ashtuquajturës “Zyrë për Kosovën” në Qeverinë e Serbisë, Petar Petkoviç, ka pandehur të hënën në një konferencë për media në Beograd se kryeministri i Kosovës, Albin Kurti, nuk dëshiron të negociojë për normalizimin e marrëdhënieve me Serbinë e aq më tepër të fillojë me hartimin e statutit të Asociacionit të Komunave me shumicë serbe në Kosovë.
Korrieri kryesor i propagandës serbe, ndër të tjera, siç transmeton agjencia serbe e lajmeve “Tanjug”, ka pretenduar se veprimet e kryeministrit Kurti janë në funksion të “mbulimit të faktit” që për dështimin e negociatave të së enjtes, kryediplomati evropian, Josep Borrell, ka drejtuar gishtin ekskluzivisht kah kreu i ekzekutivit kosovar.
“Ai u shpreh qartë se Kurti nuk do dialog e as kompromis. Askush nuk e pyet, siç thotë ai, se nuk do të japë asociacionin sepse nuk mund të pi kafe pa filxhan. Ua kanë mjeruar jetën serbëve që nuk mund ta shohin me sy e aq më pak të pinë kafe me të, përveç atyre sikurse [ministri për Komunite dhe Kthim, Nenad] Rashiç që kaluan në anën e Prishtinës”, ka thënë Petkoviçi.
“Kurti nuk do ta japë Asociacionin e Komunave me shumicë serbe, sepse sipas tij, nuk mund të pihet kafja pa filxhan. Negociatat nuk bëhen për të pirë kafe siç i shohin Kurti dhe [zëvendëskryeministri i Kosovës, Besnik] Bislimi”, ka shtuar ai, duke iu referuar metaforës së kryeministrit Kurti se ky mekanizëm s’do të themelohet derisa Serbia e refuzon njohjen e Kosovës.
Përderisa asnjë rezultat në funksion të zbatimit të Marrëveshjes Bazë (Bruksel 27 shkurt – Ohër 18 mars) nuk ka prodhuar takimi i së enjtes mes kryeministrit të Kosovës dhe presidentit të Serbisë, Aleksandër Vuçiç, shefi i diplomacisë evropiane, Josep Borrell, ka fajësuar kryeqeveritarin kosovar për mosgatishmërinë e tij për të bërë kompromis.
Negociatat diplomatike të ndërmjetësuara nga Bashkimi Evropian (BE) me përkrahjen e Shteteve të Bashkuara të Amerikës (SHBA) nuk kanë prodhuar rezultate të prekshme në drejtim të normalizimit të marrëdhënieve, derisa kryeministri Kurti e presidenti Vuçiç nuk kanë lëvizur nga qëndrimet e tyre, posaçërisht për çështjen e Asociacionit të Komunave me shumicë serbe.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com