![](https://albanianpost.com/wp-content/uploads/2023/08/polciet.jpg)
Zyrtarët policor të Kosovës do protestojnë të martën për të shprehur pakënaqësitë për pagat, përkatësisht për mosrregullimin e vlerës së koeficienteve sipas pozitave të tyre.
Lajmin e ka konfirmuar për Kosovapress, kryetari i Sindikatës së Policisë së Kosovës, Imer Zeqiri.
“Kam informacione nga dy grupe të zyrtarëve të stafit civil nga flota operative, pjesa e mjeshtërive që nE i servisojnë veturat dhe nga punëtorët e departamentit mbështetës operativ… Kam marr si paralajmërim se do të protestojnë rreth pakënaqësive për pagat”, tha ai.
“Në këtë grup janë automekanik, autolimar, murator, ujë instalues, elektricist e shumë kategori të mjeshtreve, të cilët me Ligjin e ri të pagave janë diskriminuar”.
Ai ka potencuar se vazhdimisht ka marrë premtime se do të rregullohet kjo çështje nga MPB-ja, por që deri më tani nuk ka ndodhur një gjë e tillë.
“Është muaji i shtatë që po hynë e s’po paguhen shtesat për rrezikshmëri”, ka pohuar ai.
Po ashtu Zeqiri ka treguar se vetëm këtë vit ka pasur rreth 50 dorëheqje nga policia e Kosovës.
Përveç mungesës së sigurimeve shëndetësore, për herë të parë, pas 15 vjetëve, policët kanë mbetur pa shtesa për punën me rrezik që kryejnë.
Ndërsa që nga përfundimi i luftës së fundit, 19 zyrtarë të policisë kanë humbur jetën në detyrë.
Rasti i parë është regjistruar në shtator të vitit 2001.
Me legjislacionin në fuqi, e drejta e kompensimit nga buxheti i shtetit u takon dy kategorive: familjarëve të zyrtarëve policorë që vdesin në detyrë dhe atyre në kryerje të detyrës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com