Lajme

Policët që rrezikohen çdo ditë në Veri, ende s’kanë sigurime shëndetësore


Policia e Kosovës

Nevojën për mungesën e një politike për sigurimin shëndetësor dhe jetësor të nëntë mijë policëve të Kosovës e treguan edhe një herë sulmet e fundit ndaj Policisë së Kosovës në veri të Mitrovicës.

Edhe pse në secilat palë zgjedhje premtohet për sigurime shëndetësor dhe jetësore të pjesëtarëve të Policisë së Kosovës, një gjë e tillë nuk ka ndodhur akoma.

Në një përgjigje me shkrim për Albanian Post, Policia e Kosovës bën të ditur se në mungesë të sigurimeve shëndetësore, policëve të cilët kanë nevojë ju ofrohet përkrahje shëndetësore.

“Në rastet kur punonjësi i PK-së ka pësuar lëndim/sëmundje në detyrë apo rast i veçantë shëndetësor, për të cilin trajtimi nuk është i mundshëm të realizohet në Kosovë, atëherë Shërbimet Shëndetësore përpiqen ta sigurojnë këtë trajtim nëpërmes mekanizmave ekzistues në Kosovë, nëpërmes Vendimit të Komisionit mjekësor të QKUK-së”.

“Bazuar në procedurë, shpenzimet për trajtim jashtë vendit, nëse kërkesa e punonjësit të PK-së aprovohet nga Ministria e Shëndetësisë, Ministria mbulon shpenzimet e trajtimit (% të caktuar), pjesa tjetër e mbetur financohet nga PK”, thuhet në përgjigjen e PK-së për AP.

Policia e Kosovës.

Përveç kësaj, policia e Kosovës është njëra ndër policitë e vetme në rajon që ju mungojnë sigurimet shëndetësore, edhe pse një kërkesë e tillë drejtuar institucioneve nuk ka munguar asnjëherë nga ana e tyre.

“Çështja e sigurimit shëndetësor ndër vite është kërkuar të rregullohet sepse dihet mirë se pothuajse jemi e vetmja polici që nuk posedojmë sigurim shëndetësor”.

Mungesa e veprimeve për sigurimet shëndetësore në Kosovë

Drejtori Ekzekutiv i Byrosë Kosovare të Sigurimit, Sami Mazreku, në një bisedë për Albanian Post bën të ditur se edhe pse kjo çështje është temë diskutimi tash e sa vite janë ofruar alternativa të ndryshme.

“Përfundimi gjithmonë ka qenë që meqenëse ligji për sigurime shëndetësore do të vonohet që të aplikohet, atëherë policia me gjete një formë tjetër alternative qysh të sigurohet deri sa të bëhet sigurimi shëndetësor publik”.

Në mungesë të veprimeve, Mazreku sqaron se kanë mbajtur vetëm diskutime.

“Si temë ka filluar në vitin 2018, prej asaj kohe kemi mbajtur takime disa herë me Policinë e Kosovës disa herë me sindikata disa herë me grup punuese kemi marrë informata nga policia se çka po dëshirojnë ata me siguru në çfarë forme për sigurim shëndetësor edhe bashkëpunim me të gjitha kompanitë njëjtë si atëherë në shoqatë sikurse tash në byro jemi mbledhur dhe e kemi bërë një ofertë të përbashkët që ja kemi dërgu sindikatës së policisë”.

Njëri nga sulmet ndaj Policëve të Kosovës në veri të Mitrovicës.

Se sigurimet janë më se të domosdoshme për policinë e Kosovës, dëshmohet edhe nga periudha të ndryshme që ka kaluar kjo polici dhe po vazhdon të kaloj.

“Sigurimi nuk është luks është nevojë e kohës duke e ditur se edhe çka po kalon policia e Kosovës duke e ditur edhe periudhën e COVID-19 edhe rastet e fundit në veri”, deklaron Mazreku.

Besim Kodra nga Shoqata e të Drejtave të Pacientëve në Kosovë (PRAK), thotë për Albanian Post se ka qytetarë që nuk kërkojnë fare shërbime shëndetësore.

“Në vitin 2017 në Raportin e Progresit për Kosovën është konstatuar se 18 për qind e qytetarëve të Kosovës nuk kërkojnë shërbime shëndetësore për shkak të barrës financiare”, tha Kodra.

Por potencoi se, “mungesa e sigurimeve shëndetësore po i lë në mëshirën e sëmundjes shumë qytetar të Kosovës, pasi që një pjesë e madhe e tyre nuk arrijnë t’i mbulojnë me paratë e tyre nevojat shëndetësore”.

Kodra, theksoi nevojën emergjente për sigurimet shëndetësore, në mënyrë që Kosova të sigurojë kujdes shëndetësor universal për të gjithë, pa marr parasysh kushtet financiare dhe ato të sëmundjes së pacientit.

Ndërsa, sipas tij, institucionet duhet të veprojnë në mbrojtje të shëndetit dhe jetës së qytetarëve të vendit.

“Arsye kryesore pse nuk ka sigurime është neglizhenca e institucioneve për t’u përgatitur për këtë proces. Tjetër arsye është edhe sabotimi i procesit nga akter të ndryshëm të cilët nuk e kanë me interes fillimin e këtij procesi”.

Partitë politike në programet e tyre parashohin gjithmonë sigurimin shëndetësor.

Në planin për shëndetësi nga Lëvizja Vetëvendosje thuhet që: “Funksionalizimi i sigurimeve shëndetësore publike është detyrë jona, për të cilën zotohem para jush se do të përmbushet”.

Partitë politike gjithmonë në planë kanë sigurimet shëndetësore

Gjithashtu, veçmas nga sigurimet shëndetësore publike, Vetëvendosje në planin për Sigurime Publike parasheh edhe sigurim shëndetësor e jetësor për policët.

Edhe Lidhja Demokratike e Kosovës në prioritetet dhe parimet në shëndetësi në pikën e katërt parasheh sigurimet shëndetësore.

Kurse Partia Demokratike e Kosovës në planin për rimëkëmbje të shëndetësisë ka plan që sigurimet shëndetësore t’i realizojë brenda tre mujorit të parë të qeverisjes së saj.

Që nga viti 2004, ligji për sigurime shëndetësore është hartuar dhe është dorëzuar në Qeverinë e Kosovës.

Ky ligj është miratuar në vitin 2007, mirëpo deri tani asnjëherë nuk ka hyrë në fuqi, pasi që ishte tërhequr. Zbatimit të ligjit, ishte parashikuar se do t’i paraprinte një periudhë prej gjashtë muajsh, gjatë së cilës do të mblidheshin fondet.

Mbledhja e fondeve për ligjin e sigurimeve shëndetësore ishte paralajmëruar të nis që nga 1 korriku i vitit 2017.

Atë kohë ishin ndarë nga Qeveria e Kosovës 17 milionë euro, derisa më pas ishin tërhequr për t’u orientuar në një destinacion tjetër, përkatësisht për pagesat e pensioneve për veteranët e luftës. Prej atëherë çështja ka mbetur pezull.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore