![](https://albanianpost.com/wp-content/uploads/2023/07/thnbghjmn-gjh.png)
Dështimi për të trajtuar hendekun në rritje midis të pasurve dhe të varfërve të botës do të rrënjos varfërinë dhe do të rrisë rrezikun e ndryshimeve klimatike.
Kështu kanë paralajmëruar një grup prej më shumë se 200 ekonomistësh.
Në një letër drejtuar Sekretarit të Përgjithshëm të OKB-së, António Guterres dhe presidentit të Bankës Botërore, Ajay Banga, nënshkruesit nga 67 vende u bëjnë thirrje të dy organeve të bëjnë më shumë për të ndalur rritjen më të mprehtë të pabarazisë globale që nga Lufta e Dytë Botërore.
Ata që mbështesin thirrjen për veprim përfshijnë ish-sekretarin e përgjithshëm të OKB-së Ban Ki-moon, ish-kryeministren e Zelandës së Re Helen Clark dhe ekonomistët Jayati Ghosh, Joseph Stiglitz dhe Thomas Piketty.
Ulja e pabarazisë deri në vitin 2030 ishte një nga 17 objektivat e OKB-së për zhvillimin e qëndrueshëm (SDG) të rënë dakord nga komuniteti ndërkombëtar në vitin 2015.
Referuar letrës së tyre, nevojitet veprim urgjent në dritën e ndikimit të ndryshëm të pandemisë te të pasurit dhe të varfrit.
Lera, duke argumentuar se pabarazia në rritje është “injoruar në masë të madhe”, thotë se mjetet aktuale për vlerësimin e progresit në trajtimin e problemit nuk marrin parasysh përqendrimin e të ardhurave dhe pasurisë midis super të pasurve.
Për herë të parë në një çerek shekulli, varfëria globale dhe pasuria ekstreme janë rritur njëkohësisht.
“Qëllimet kanë rëndësi. Lidershipi ka rëndësi. Banka Botërore dhe SDG-të e OKB-së janë të vendosura në mënyrë unike për të ofruar thirrjen për një reduktim të pabarazisë që bota jonë e ndarë ka nevojë kaq urgjente sot”, vijon letra.
Po ashtu kërkohet matje më e mirë e pabarazisë dhe objektiva më ambicioz për ngushtimin e boshllëqeve të të ardhurave dhe pasurisë.
“Ne po jetojmë një kohë të pabarazisë jashtëzakonisht të lartë ekonomike. Varfëria ekstreme dhe pasuria ekstreme janë rritur ndjeshëm dhe njëkohësisht për herë të parë në 25 vjet. Midis vitit 2019 dhe 2020, pabarazia globale u rrit më shpejt se në çdo kohë që nga Lufta e Dytë Botërore”.
“10 përqindëshi më i pasur i popullsisë globale aktualisht merr 52 për qind të të ardhurave globale, ndërsa gjysma më e varfër e popullsisë fiton 8.5 për qind të tyre. Miliarda njerëz përballen me vështirësitë e tmerrshme të çmimeve të larta dhe në rritje të ushqimeve dhe urisë, ndërkohë që numri i miliarderëve është dyfishuar në dekadën e fundit”.
Kur Guterres rishikoi objektivat e vitit 2030 në prill, ai gjeti pabarazinë në një rekord të lartë, me vetëm 10 për qind të vendeve në rrugën e duhur për të përmbushur objektivin.
Tetorin e kaluar, Banka Botërore ka bërë me dije se përparimi në uljen e varfërisë ishte ndalur.
Gjithashtu parashikoi se pa një përshpejtim dramatik të përpjekjeve, nuk do të kishte asnjë shans për të përmbushur objektivin për t’i dhënë fund varfërisë ekstreme deri në vitin 2030.
“Ne e dimë se pabarazia e lartë minon të gjitha synimet tona sociale dhe mjedisore. Ajo gërryen politikën tonë, shkatërron besimin, pengon prosperitetin tonë kolektiv ekonomik dhe dobëson multilateralizmin. Ne e dimë gjithashtu se pa një reduktim të mprehtë të pabarazisë, qëllimet e dyfishta për t’i dhënë fund varfërisë dhe parandalimi i prishjes së klimës do të jenë në konflikt të qartë”, vijon letra.
Dhe se trajtimi i pabarazisë nuk është një qëllim i pavarur dhe se të gjitha politikat ekonomike, financiare dhe sociale duhet të vlerësohen në kuptimin e ndikimit të tyre të mundshëm në të.
“Kjo do të sinjalizonte qartë ambicien tonë kolektive për të krijuar një botë më të barabartë”.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Paga minimale në Shqipëri mbetet më e ulëta në Evropë në bazë të fuqisë blerëse
-
Sejko: Rritje ekonomike si efekt i kursit të këmbimit, ulen kreditë e këqija
-
A është ekonomia amerikane më mirë apo më keq tani sesa nën administratën Trump?
-
Sejko takim me delegacionin e Moody’s: Ekonomia shqiptare me rritje solide, sektori bankar i qëndrueshëm