![](https://albanianpost.com/wp-content/uploads/2021/09/qeveria-1.jpg)
1 milionë euro i janë ndarë shtatë komunave të Kosovës në mbledhjen e Qeverisë.
Këto mjete do të shpenzohen për projektin “programi komunal për zhvillim të infrastrukturës socio-ekonomike dhe bashkëpunim ndër-komunal”.
Gjithashtu, qeveria në mbledhjen e të mërkurës ka marrë vendim edhe për ndarjen e mbi gjysmë milioni euro për mbështetjen e prodhuesve vendorë në kuadër të Programit të Ringjalljes Ekonomike.
Ky propozim ka ardhur nga ministri i Financave, Hekuran Murati, i cili theksoi se mjetet e ndara parashihet t’i japin mbështetje prodhuesve vendorë në ngritjen e kapaciteteve prodhuese.
“Për mbështetjen e prodhuesve vendorë dhe bëhet fjalë për mbështetje shtesë prej 600 mijë euro për prodhuesit, në mënyrë që ata të kenë mbështetje për ngritje të kapaciteteve prodhuese dhe kapaciteteve të stafit”.
![](https://albanianpost.com/wp-content/uploads/2022/08/auto_auto_hekuran-murati-1536x102416480762491656339359-1.jpg)
Një tjetër vendim i miratuar ishte edhe ndarja e mjeteve në vlerë prej 100 mijë eurove për mbështetjen me shtesa nga 100 euro për punëtorët e sektorit publik.
“Bëhet fjalë për plotësim-vendimin paraprak që kishte të bënte për ndarjen e mjeteve për mbështetjen e të punësuarve në sektorin publik, dhe bëhet fjalë për kategori që kanë mbetur pa u trajtuar në rundin e parë dhe kësisoj duhet të ketë mjete shtesë prej 100 mijë euro”, tha ministri Murati.
Ekzekutivi emëroi edhe anëtarët në bordet e katër Ndërmarrjeve Publike Qendrore “Trainkos”.
Kryesues i Bordit është emëruar Nol Dedaj.
Ndërkaq, anëtarë të bordit të drejtorëve të ndërmarrjes publike të hekurudhave janë emëruar: Astrit Mehaj, Drita Kadriu-Berisha, Blerina Shamolli, Rizah Spanca dhe Shaban Neziri.
Edhe për Bordin e Kompanisë së Ujësjellësit Hidroregjioni Jugor u votua.
Kryesues u zgjodh Feim Fetoshi, dhe anëtarë Mirlinda Morina, Naim Ukaj dhe Arben Hajrizi.
Në këtë mbledhje u miratua vendimi për emërimin edhe të Bordit të kompanisë Ujitjes Radoniqi-Dukagjini.
12 kandidat i janë rekomanduar Qeverisë, përderisa për kryesues u propozua Ilir Dula.
Qeveria gjithashtu ka marrë vendim për emërimin e drejtorëve të kompanisë rajonale ujësjellësi “Bifurkacioni”.
Për kryesues të Bordit është propozuar Naim Rexhaj kryesues, Kujtesa Ahmeti për anëtare, edhe Kujtesa Ramadani për anëtare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com