![](https://albanianpost.com/wp-content/uploads/2022/03/iojeroigje9083453.png)
Hazir Borovci ka përfunduar dëshminë e tij të filluar të mërkurën e 30 marsit në gjykimin ndaj të akuzuarit Salih Mustafa në Hagë, ku në fund të dëshmisë ka thënë se gjykata të mos bie pre e dëshmitarëve të manipuluar dhe të shantazhuar.
Ai i ka thënë gjykatësit se nga ai nuk po kërkon mëshirë, por po kërkon drejtësi.
“Jam shumë i bindur se do të vendosni drejt, do t’i analizoni mirë të gjithë dëshmitarët, të mos bini pre e dëshmitarëve të manipuluar, shantazhuar, por t’i analizoni mirë rrethanat në të cilat kemi veprua e punuar që kanë qenë tejet të vështira”.
Borovci ka thënë se ajo çfarë i ka ndodhur popullit shqiptarë, nuk duhet t’i ndodh asnjë populli e asnjë kombi. Me Salih Mustafën, Borovci ka deklaruar para trupit gjykues se gjatë luftës ka pasur takime të shpeshta.
![](https://albanianpost.com/wp-content/uploads/2022/03/iojeroigje9083453-1.png)
“E kam thënë dje dhe e them edhe sot. E kam pasur shok dhe fqinj, kemi pasur shtëpitë afër. Se e kam shok dhe fqinj, kjo nuk ndryshon asgjë në dëshminë time”, ka deklaruar ai.
Ndërsa i pyetur rreth deklaratave të Salih Mustafës në gjykatë, Borovci ka deklaruar se për to është pak në dijeni, dhe se rreth tyre është informuar prej mediave.
“Nuk jam marrë shumë me deklarata, ajo ishte risi që për herë të parë e dëgjova”.
“Përjashto mediat nga të cilat jemi informuar. Mbase duke qenë i bindur në pafajësinë dhe pastërtinë e Salih Mustafës” duke shtuar se “kam dëgjuar dhe lexuar nga mediat, nuk kam pas asnjë informacion tjetër nga askush”, ka thënë Borovci në dëshminë e tij.
Dëshmitari Borovci, ka deklaruar se deri me 12 qershor ka qenë në Butovc, pra ditën kur edhe kanë hyrë forcat paqeruajtëse në Prishtinë.
Hazir Borovci, ishte dëshmitari i katërt i mbrojtjes së Salih Mustafës.
Aktakuza ndaj Mustafës është konfirmuar më 12 qershor 2020.
“Aktakuza e konfirmuar përcakton se afërsisht midis 1 prillit 1999 dhe 19 prillit 1999, në një kompleks ndalimi në Zllash, Kosovë, u kryen krimet e ndalimit arbitrar, trajtimit mizor dhe të torturës kundër të paktën gjashtë personave. Gjithashtu, në aktakuzë thuhet se në një datë midis 19 prillit 1999, ose rreth kësaj date, dhe rreth fundit të prillit 1999, në atë vendndodhje u vra një i ndaluar”, ka njoftuar Gjykata Speciale përmes një komunikate.
Bëhet e ditur se në aktakuzën e konfirmuar, Salih Mustafa akuzohet në kuadër të formave të ndryshme të përgjegjësisë penale, për: ndalim arbitrar, trajtim mizor, torturë dhe vrasje të paligjshme si krime lufte të kryera në kontekstin e konfliktit të armatosur jo ndërkombëtar në Kosovë, ose në lidhje me atë konflikt .
![](https://albanianpost.com/wp-content/uploads/2022/03/222.jpg)
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com