![](https://albanianpost.com/wp-content/uploads/2022/03/nafte-1.jpg)
Në Kosovë rritja e çmimeve të naftës dhe benzinës ka shënuar nivelin më të lartë në 20 vjetët e fundit.
Shoqata e Naftëtarëve të Kosovës, ka bërë të ditur se çmimet e naftës në Kosovës sillen nga 1.25 euro deri në 1.41 euro, ndërsa çmimet e benzinës nga 1.27 euro deri në 1.52 cent.
Mirëpo, për këtë rritje të çmimeve të naftës, Qeveria e Kosovës me 1 mars doli me vendim se do të përcaktojë çmimet maksimale për naftë dhe derivate të naftës.
Në komunikatën për media thuhet se kjo po bëhet me qëllim të mbrojtjes së konsumatorëve nga lëvizja e madhe e çmimeve.
“Me qëllim të mbrojtjes së konsumatorëve nga lëvizjet e mëdha të çmimeve dhe eliminimit të çrregullimeve në treg me naftë dhe derivate të naftës në Republikën e Kosovës, Qeveria mori vendim që të përcaktojë çmimet shitëse maksimale/marzhat tregtare me shumicë dhe pakicë”.
Ky vendim është kundërshtuar nga Shoqata e Naftëtarëve, bën të ditur për Albanian Post, kryetari i kësaj shoqate Fadil Berjani.
“Ne ishim në takim me ministren e ekonomisë, Rozeta Hajdari, presim në këtë situatë emergjente ai vendim duhet të anulohet”.
Kreu i naftëtarëve shprehet se, “Qeveria nuk mund ta ulë çmimin e derivateve”.
![](https://albanianpost.com/wp-content/uploads/2022/03/derivate.jpg)
Ai një vendim të tillë të ekzekutivit e konsideron plotësisht të gabuar.
“Është krizë e derivateve nuk do të flasim për çmimet, çmimet janë të rritura në mënyrë enorme sikurse në Shqipëri si në Serbi si në Mal të Zi si në krejt botën, krizë e madhe është për derivate të naftës, unë mendoj një vendim i qeverisë i cili është dalur në këtë kohë është gabim është vendim i gabuar dhe besoj që ata do ta rishikojnë”.
Berjani, thekson edhe një numër të arsyeve që kanë sjellë deri në rritjen e çmimeve të karburanteve.
“Këtë rritje po e imponon konflikti mes Ukrainës dhe Rusisë, reduktimi i prodhimit në organizatën prodhuese, qëllimi është që Kosova të mos ketë mungesë të derivateve edhe pse çmimi është duke shkuar shumë lartë për standardin tonë”, shprehet ai.
Ndërsa, thotë se me problemin e ngjashëm po përballet edhe vetë ai.
“Qytetarët mund ta përdorin transportin publik, unë kam pika të karburantit vetë, ne jemi në gjendje emergjente, lufta ka kapluar Ukrainën, ky është problem në të gjithë botën”.
![](https://albanianpost.com/wp-content/uploads/2022/03/maxresdefault-1.jpg)
Në anën tjetër për njohësin e politikave ekonomike, Erton Bega, paralajmërimi për shtrenjtimin e mëtutjeshëm të çmimit të naftë është tronditës marrë parasysh inflacionin e lartë që ka përcjellë ekonominë kosovare.
Sipas tij paralajmërimi për shtrenjtimin e çmimit të naftës do të sjellë pasoja zingjirore në ekonomi pasi do të ndikon në rritjen e kostos së transportit të mallrave.
“Situata socio-ekonomike do të rëndohej edhe më shumë, pasi të ardhurat e qytetarëve kanë mbetur të pandryshueshme. Rritja e kostos do të rezultonte me inflacion në produkte esenciale të konsumit të gjerë dhe kjo do të ishte e papërballueshme për qytetarët, veçanërisht për familjet me të ardhura të ulëta”, ka thënë Bega për AP.
Ndryshe gjatë muajit maj të vitit 2020 në pikun e pandemisë COVID-19 ishte shënuar një rekord i rënies së çmimit të naftës në Kosovë.
Kështu çmimi i karburanteve gjatë kësaj periudhe kishte rënë deri në 80 cent për një litër karburant.
Në anën tjetër, në Kosovë përveç rritjes së çmimit të naftës, është shtrenjtuar edhe energjia elektrike për konsumatorët që shpenzojnë më shumë se 800 kilovatë orë, pas vendimit të Zyrës së Rregullatorit të Energjisë.
Tarifat e reja do të aplikohen nga 9 shkurti, deri më 31 mars të vitit 2023.
Ky vendim i ZRRE-së është kundërshtuar ashpër nga partitë opozitare në Kuvend dhe organizatat e shoqërisë civile, të cilat kanë deklaruar se kostoja e faturës për energji elektrike do të jetë e papërballueshme për qytetarët e Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com