“Zyrtarët e korruptuar në Kosovë vazhdojnë të mbajnë poste të larta shtetërore”

“Shumë zyrtarë të korruptuar vazhdojnë të jenë në pozita në sektorin publik në Kosovë”, thuhet në raportin e Departamentit Amerikan të Shtetit për vitin 2020.

Po ashtu sipas raportit të DASH-it “shumë njerëz në qeveri, opozitë, shoqëri civile dhe media raportuan për raste të zyrtarëve të lartë të përfshirë në korrupsion ose që vepronin pa u ndëshkuar”.

Këto të gjeturat të amerikanëve, sipas juristit Anton Nrecaj janë vazhdimësi e kërkesave dhe vërejtje drejtuar Qeverisë dhe institucioneve përgjegjëse në Kosovë.

“Për vite me radhë kanë dhënë vërejtje në raport me nivelin e korrupsionit në vend e në veçanti për zyrtarët e lartë shtetërorë, të cilët janë të korruptuar dhe të cilët vazhdojnë të mbeten në poste të larta shtetërore”, tha Nrecaj për Albanian Post.

“Fatkeqësisht nga niveli i lartë i korrupsionit në vend dhe mos veprimet e institucioneve në luftën kundër korrupsionit radhit Kosovën në vendet me nivel të lartë të korrupsionit me një demokraci të brishtë dhe sistem të drejtësisë të kapur dhe me ndikim nga politika”.

Sipas tij “SHBA është ndër shtetet që ka investuar dhe është duke investuar më miliona dollarë në fuqizimin e sistemit të drejtësisë dhe institucioneve për të luftuar korrupsionin”.

“Ky raport është një indikator se Kosova nuk ka rrugë tjetër pos të marr hapa konkret në luftën kundër korrupsionit”, shtoi Nrecaj.

Ndëra Besnik Boletini nga Organizta Çohu, potencoi për Albanian Post se në vazhdimësi në vitet e fundit ka pasur zyrtarë të lartë publikë që kanë ushtruar pozita të ndryshme edhe vendimmarrëse e që kanë qenë me aktakuza të konfirmuara.

“Duke marrë parasysh kontekstin tonë shoqërorë, rrethanat dhe sistemin e brishtë të drejtësisë, konsideroj se zyrtarët që kanë aktakuza të konfirmuara nuk duhet të jenë pjesë e institucioneve shtetërore për aq sa lejon legjislacionit në fuqi”, potencoi Boletini.

Ai shton se “të gjithë zyrtarët që kanë aktakuza e që janë të emëruar politik, pra që nuk janë zgjedhur me konkurs, do të duhej të shkarkoheshin, për të dhënë një shembull të mirë, por edhe të shmanget ndonjë ndikim direkt apo indirekt në procesin gjyqësore”.

“Ka pasur apo mund të ketë zyrtarë që kanë qenë të akuzuar dhe kanë mbajtur njëkohësisht pozita të larta në institucione”.

Edhe Raporti i Transparency International i publikuar në fillim të këtij viti ka gjetur se Kosova nuk ka bërë asnjë përparim në luftën kundër korrupsionit.

Sipas këtij raporti “korrupsioni vazhdon të mbetet një problem madhor në Kosovë, që pengon përparimin demokratik dhe frenon aspiratat e qytetarëve për një jetë më të mirë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.