Lajme

Zyrtare: Maqedonia e Veriut dhe Vetoja e Bullgarisë bllokojnë hapjen e negociatave


Sekretarja e Shtetit për Çështjet Evropiane të Portugalisë, Anna Paula Zacarias, në një konferencë për mediat në përfundim të takimit, deklaroi me keqardhje se “pavarësisht të gjitha përpjekjeve, nuk u dakordësuan mbi një datë për mbajtjen e një konference ndërqeveritare mes Bashkimit Evropian dhe Shqipërisë e Maqedonisë së Veriut”.

Sipas saj, shkak u bë “ngërçi i Maqedonisë së Veriut dhe Vetoja e Bullgarisë me parashtrimin e kushteve të saj”.

Ndërkaq, Zacarias sqaroi se kjo çështje mbetet për t’u shqyrtuar në vijim, për të mos e humbur “momentumin e saj”.

Ajo shtoi se Presidenca e ardhshme sllovene do të vijojë me angazhimin e saj mbi këtë çështje që, sipas saj “mbetet jetike për BE-në”.

Gjatë takimit, ministrat e BE-së “shënuan zhvillimet e fundit”, shpjegoi Zacarias dhe “nënvizuan rëndësinë strategjike dhe realitetin gjeopolitik të procesit të zgjerimit të BE-së që përfaqëson një investim në paqe, demokraci, prosperitet, në sigurinë dhe stabilitetin e unionit”.

Zacarias u shpreh se ministrat gjithashtu “vunë theksin mbi arritjen e një marrëveshje politike me Parlamentin e BE-së në lidhje me rregulloren Ipa III (instrument i ndihmës së para-pranimit), e cila nën presidencën sllovene mund të kalojë në zbatim”, dhe diskutuam të ardhmen e Konferencave ndërqeveritare me Serbinë dhe Malin e Zi.

Vetoja bullgare

Gjatë gjysmës së dytë të ditës, më 22 qershor, Ministria e Punëve të Jashtme të Bullgarisë konfirmoi sërish pozicionin e saj mbi ofertën e Maqedonisë së Veriut.

“Bullgaria riafirmoi pozicionin e saj mbi perspektivën evropiane të Republikës së Maqedonisë Veriore gjatë takimit të sotëm të rregullt të Këshillit të Çështjeve të Përgjithshme (GCC), ndërsa ishte e hapur për një dialog konstruktiv me Presidencën e ardhshme Sllovene të Këshillit të BE-së për gjetjen e ndërsjellë të një zgjidhjeje të pranueshme”, shkruhet në deklaratën e tyre zyrtare të publikuar në web.

Bullgaria vlerësoi arritjet e Shqipërisë në procesin e reformës dhe riafirmoi mbështetjen e saj për miratimin e kornizës negociuese të vendit.

Kushtet e Bullgarisë përfshijnë refuzimin e qartë të Republikës së Maqedonisë Veriore nga pretendimet territoriale, të pakicave dhe historike ndaj Bullgarisë.

Sakaq, ata kërkojnë ndryshimin e mbishkrimeve apo monumenteve që nxisin urrejtjen ndaj Bullgarisë në Republikën e Maqedonisë Veriore.

Autoritetet bullgare rendisin dhe aktivizimin e një procesi të rehabilitimit të viktimave të Jugosllavisë komuniste në kushtet e tyre.

Ançe Logar

Më herët, ministri i Jashtëm Slloven, Ançe Logar, në një deklaratë për Euractiv, u shpreh se me hyrjen e palëve të treta në rajon, bashkangjitur interesave të tyre strategjike, mosveprimi i BE-së në rajon është “strategjikisht i rrezikshëm”.

Sipas tij, BE-ja duhet të lëvizë sa më shpejt të jetë e mundur. Logar nënvizoi se përparësia e Presidencës së ardhshme të Këshillit të BE-së do të jetë trajtimi i zgjerimit të Ballkanit Perëndimor.

“Në vitet e fundit, strategjia e BE-së drejt Ballkanit Perëndimor ishte një qasje e pritjes dhe kontrollit, me bllokun që nuk ishte shumë aktiv në rajon përballë një bllokimi reformash”, tha Logar.

Martin Klus

Këshilli i Çështjeve të Përgjithshme të Bashkimit Evropian diskutoi të martën e 22 qershorit sesi të zhbllokojë fillimin e negociatave të pranimit për Shqipërinë dhe Maqedoninë e Veriut.

Kjo ishte deklarata në fillim të agjendës ditore nga sekretari i Shtetit të Ministrisë së Punëve të Jashtme dhe Evropiane të Republikës Sllovake, Martin Klus.

Pas mbërritjes së tij në takim, Klus tha se pjesëmarrësit do të zhvillojnë diskutime “të sinqerta” se si të fillojnë procesin e bisedimeve të pranimit për Shqipërinë dhe Maqedoninë e Veriut.

Michael Roth

“Ju lutem, zgjidhini çështjet dypalëshe në mënyrë bilaterale dhe mos bllokoni gjithë Evropën të ecë përpara”.

Ky ishte mesazhi i ministrit gjerman të Shtetit për Evropën, Michael Roth, gjatë mbledhjes së Këshillit të Çështjeve të përgjithshme.

Ministri gjerman i bëri kështu thirrje Bullgarisë, që të zhbllokojë Maqedoninë e Veriut nga vetoja.

“Të mendojmë në mënyrë strategjike dhe të kuptojmë se duhet të përmbushin detyrimet tona ndaj Shqipërisë dhe Maqedonisë së Veriut tani”, shkruan Roth në Twitter.

David Sassoli

Më herët, Presidenti i Parlamentit Evropian, David Sassoli i kërkoi Bashkimit Evropian të lejojë vendet e Ballkanit Perëndimor që t’i bashkohen bllokut.

Ai vuri në dukje se një zgjerim i tillë do të ishte “një projekt pozitiv për paqen dhe prosperitetin”.

Maqedonia e Veriut kaloi vite, duke zgjidhur mosmarrëveshjen për emrin me Greqinë për të zhbllokuar bisedimet e anëtarësimit me BE-në.

Maqedonia e Veriut

Në vitin 2018, Maqedonia e Veriut – asokohe Maqedoni –  ra dakord që të ndryshojë emrin e saj.

Në tetor të 2019-s, Franca, Danimarka dhe Holanda bllokuan fillimin e bisedimeve të pranimit me Maqedoninë e Veriut dhe Shqipërinë, duke përmendur nevojën për reforma të mëtejshme te të dyja vendet.

Në mars të 2020-s, Komisioni Evropian njoftoi se kombet e BE-së kishin rënë dakord të hapnin bisedimet. Procesi mbahet “peng” nga Bullgaria, e cila ka bllokuar fillimin e bisedimeve të pranimit midis Maqedonisë së Veriut dhe BE-së që nga nëntori 2020 mbi mosmarrëveshjet në lidhje me gjuhën, pakicat etnike dhe çështjet historike.

Shqipëria

Samiti i vendeve të Ballkanit Perëndimor u mblodh më 10 qershor, nën drejtimin e kryeministrit Rama. I pranishëm ishte edhe Komisioneri Evropian për Zgjerim, Oliver Varhelyi.

“Jo vetëm liri ekonomike, por edhe liri lëvizjeje brenda BE-së”.

Kjo do të ishte kërkesa e Ramës në fund të Samitit, duke iu referuar konceptit të Schengen-it Rajonal dhe njohjen e vaksinimeve të Ballkanit në Evropë.

Mbi integrimin, vetëm shpresë se Konferenca e Parë Ndërqeveritare, do të marrë një “Po” brenda muajit.

Një ditë më pas, Shqipëria zgjidhet për herë të parë në histori si anëtare jo e përhershme e Këshillit të Sigurisë në Organizatën e Kombeve të Bashkuara.

Me 175 vota pro dhe mbështetjen e gjithë vendeve të rajonit, Shqipëria do të jetë jo vetëm adresuese e shqetësimeve rajonale në dy vite, por edhe vendimmarrëse mbi çështje themelore të sigurisë botërore.

Holanda

Komisioni i Jashtëm i Parlamentit Holandez, më 16 qershor, dha miratimin për çeljen e negociatave Shqipëri-BE. Kjo, pas një mohimi të gjatë dhe kushtëzimeve të vazhdueshme nga pala holandeze.

Vetëm një ditë më vonë, Parlamenti i Holandës e miratoi rekomandimin, duke e bërë faktike mbështetjen ndaj Shqipërisë.

Sipas tyre, përparimi në drejtësi dhe lufta ndaj krimit e korrupsionit ishte themelore në arritjen e këtij vendimi.

Por, një Veto bullgare për maqedonasit, është ende aty e palëkundur dhe e atillë do të mbetet, të paktën deri në krijimin e një qeverie të re jo tranzitore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore