Zvicra e lë Kosovën në listën e vendeve me rrezik të lartë për COVID-19

Zvicra ka hequr shumicën e masave kufizuese për parandalimin e përhapjes së COVID-19, Kosova ka mbetur në listën e vendeve me rrezik të lartë.

Ambasada e Zvicrës në Kosovës, ka thënë se vaksinimi i plotë i qytetarëve nga Kosova që duan të hyjnë në Zvicër, mbetet në fuqi.

“Pavarësisht vendimit të autoriteteve zvicerane për lehtësimin e kritereve për të hyrë në Zvicër, Kosova mbetet në listën e vendeve me rrezik të lartë”.

“Si të tilla, kërkesat e mëparshme për të hyrë në Zvicër përfshirë vaksinimin e plotë, mbetet në fuqi deri në një njoftim tjetër”, ka njoftuar kjo ambasadë ne Facebook.

Ndryshe, Zvicra nga 17 shkurti ka lehtësuar masat anti-COVID, duke lejuar të mbahen edhe tubime.

Instituti Kombëtar i Shëndetit Publik në Kosovë (IKSHPK), ka raportuar se brenda 24 orëve, kanë humbur jetën pesë persona dhe janë regjistruar 411 raste të reja me COVID-19.

Numri i të infektuarve vjen nga 3 mijë e 820 mostra të marra nga Shërbimi Spitalor dhe Klinik Universitar i Kosovës.

Sipas Ministrisë së Shëndetësisë, gjatë 24 orëve të fundit janë shëruar gjithsejtë një mijë e 2 mijë e 582 persona.

Raste aktive me COVID-19, janë gjithsejtë 6 mijë e 509.

Brenda 24 orëve të fundit, në Kosovë janë vaksinuar gjithsej 1 mijë e 275 persona.

Ndërkaq, 812 mijë e 299 persona janë vaksinuar me dozën e dytë, teksa numri i të vaksinuarve me dozat e treta të vaksinës ka arritur 95 mijë e 264.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.