ZRRE shtyn afatin për dhënien e komenteve për tarifat

Zyra e Rregullatorit për Energji (ZRRE) ka shtyrë afatin për tre ditë, përkatësisht deri më 31 janar, për dhënie të komenteve në raportet e publikuara për konsultim publik.

“Raportin mbi të Hyrat e Lejuara Maksimale (HLM) të Furnizuesit të Shërbimit Universal të Operatorit të Sistemit të Transmisionit dhe Tregut (KOSTT) dhe të Operatorit të Sistemit të Shpërndarjes (OSSH), raportin konsultativ që paraqet qëndrimet e ZRRE-së për ristrukturimin e tarifave të nevojshme për të përmbushur kostot e blerjes së energjisë elektrike dhe për të rivendosur furnizimin me energji elektrike për konsumatorë”.

Kjo shtyrje sipas ZRRE-së ka ndodhur pasi që kanë marrë parasysh interesimin e palëve.

“Afati do të zgjatet deri më 31 janar, në orën 16:00”.

“Palët që dëshirojnë të shprehin komentet e tyre për qëndrimin e ZRRE-së, ftohen t’i dorëzojnë komentet e tyre me shkrim në adresën [email protected]“,thuhet në njoftim.

Të frustruar me rritjen e çmimit të rrymës dhe qasjen e kryeministrit të Kosovës, qytetarët kanë protestuar në Prishtinë duke brohoritur “Albin mashtruesi”, “Albin rrenci”.

Gjithashtu, Partia Socialdemokrate e Kosovës (PSD), ka organizuar një aksion protestë tek ndërtesa e Qeverisë së Kosovës, duke vendosur në hyrje të ndërtesës një baner me mbishkrimin “Zyra për Informim KEDS dhe KESCO”.

“Nga dje e këtyre ditëve të fundit, nuk është zyrë e kryeministrit e Qeverisë së Kosovës që përfaqëson interesat e Kosovës por është zyrë e mekanizëm shtetëror, që i është nënshtruar tërësisht Korporatës së Distribucionit të Energjisë siç është KEDS-i dhe KESCO”, ka thënë Nol Nushi nga PSD.

S’ka kuorum, shtyhet votimi i Rezolutës së opozitës kundër shtrenjtimit të energjisë

As në seancën e cila po mbahet sot (e mërkure) s’ka pasur kuorum për ta votuar Rezolutën me të cilën kërkohet që të mos ketë rritje të çmimit të energjisë elektrike.

Në votim kanë marrë pjesë 30 deputetë, ndërsa partia në pushtet, Lëvizja Vetëvendosje (LVV) s’ka marrë pjesë në seancë, por që deputetët e këtij subjekti kanë ardhur në seancë vetëm pas dështimit të kësaj pike.

Kjo pikë është shtyrë për një seancë të radhës.