ZPS: Nuk synojmë të mbështetemi në 10 dëshmitarë që dëshmuan ndaj ish krerëve të UÇK-së
Zyra e Prokurorit të Specializuar (ZPS), ka dorëzuar një parashtrim përmes të cilit ka njoftuar panelin e trupit gjykues në rastin e ish-krerëve të Ushtrisë Çlirimtare të Kosovës, që nuk do të mbështetet në dëshminë e 10 dëshmitarëve.
Prokurorja Kimberly West, ka thënë se ZPS-ja synon që të dorëzojë me shkrim dëshmitë e 13 dëshmitarëve e jo të dëshmojnë fizikisht.
“Pas shqyrtimit të faktorëve të tillë, ZPS nuk synon më të mbështetet në dëshmitë e dhjetë (10) dëshmitarëve. Përveç kësaj, ZPS-ja synon t’i dorëzojë me shkrim dëshmitë e trembëdhjetë (13) dëshmitarëve në vijim, në vend që t’i thërrasë ata të dëshmojnë”, thuhet në parashtrimin e ZPS-së.
Më 8 maj, zëdhënësi i Dhomave të Specializuara të Kosovës (DhSK), Michael Doyle, ka bërë të ditur se janë pranuar pjesërisht dëshmitë e gjashtë dëshmitarëve me shkrim në çështjen e eprorëve të Ushtrisë Çlirimtare të Kosovës – kërkesë kjo që është bërë nga Zyra e Prokurorit të Specializuar.
Doyle, sqaroi se kjo është bërë për shkak se disa nga dëshmitarët kanë probleme shëndetësore, e disa të tjerë kanë vdekur.
“Më 3 maj, Trupi Gjykues miratoi pjesërisht kërkesën e Prokurorisë për pranimin e dëshmive me shkrim të gjashtë dëshmitarëve të cilët nuk mund të japin dëshmi me gojë për arsye të ndryshme, përfshirë për arsye mjekësore dhe shëndetësore, si dhe për faktin që disa dëshmitarë kanë vdekur”, kishte thënë Doyle.
Në Speciale, të martën kanë nisur dëshminë dy dëshmitarë, njëri që ka qenë Oficer i ushtrisë Federale të Gjermanisë, Dietrich Klaus Jensch, teksa dëshminë është duke e vazhduar dëshmitari i 54-të, Johan Fritsch.
Prej mbi 300 dëshmitarëve në total, deri tani janë dëgjuar 62 prej tyre – shqiptarë, serbë, ekspertë ndërkombëtarë, ish-komandantë të UÇK-së e viktima të pretenduara të luftës – kryesisht në seanca të mbyllura, ndërsa të martën pritet të vazhdojë dëgjimi i dëshmitarit të 63-të.
Ish-presidenti i Kosovës, ish-kryeparlamentarët kosovarë dhe ish-shefi i deputetëve të Lëvizjes Vetëvendosjes (LVV), akuzohen nga e Zyra e Prokurorit të Specializuar (ZPS) për vrasje të pretenduara, torturë e trajtim mizor në periudhën midis viteve 1998–1999. Në procesin gjyqësor që nisi më 3 prill 2023, katër ish-drejtuesit e UÇK-së u deklaruan të pafajshëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Specialja hedh poshtë kërkesën e mbrojtjes për apelimin e vendimit për pranimin e disa deklaratave me shkrim
-
Thaçit e Veselit u vazhdohet paraburgimi
-
Intervistat pa leje, Specialja – Haradinajt: Çdo shkelje tjetër do të rezultojë me kthim në burg
-
Milovan Dreçun: Aktakuza kundër Thaçit, Veselit, Selimit dhe Krasniqit, rezultat i punës sonë
Lajmet kryesore
-
Si një reportere lufte e CNN, Arwa Damon mendoi se kishte parë gjithçka – pastaj ajo shkoi në Gaza
-
Daku pezullohet nga UEFA dy ndeshje, pas koreve ofenduese në Euro 2024
-
Një vit pas kryengritjes, Kremlini kontrollon të mbeturit e Wagner
-
Kurti u bën thirrje komuniteteve joshumicë që të aplikojnë për punë në institucione