Zllatan Ellek, kryetar i ri Listës Serbe

Drejtori i Qendrës Spitalore Klinike në Mitrovicë, Zllatan Ellek, është zgjedhur kryetar i ri i Listës Serbe, raporton mediumi serb Kossev.

Ellek u zgjodh kryetar në mbledhjen e Kuvendit të Listës Serbe të mbajtur të martën në Mitrovicën e Veriut.

Në maj të vitit 2020, Qeveria e Serbisë emëroi Ellekun ushtrues detyre të drejtorit të Qendrës Spitalore Klinike në Mitrovicën e Veriut.

Gjatë këtij muaji ai ka theksuar se për shkak të “terrorit të kryeministrit të Kosovës, Albin Kurtit”, institucionet shëndetësore në zonat serbe në Kosovë po kërcënohen nga “katastrofa humanitare”.

Ndërkaq, nënkryetarë të rinj të Listës Serbe janë zgjedhur Dragisha Milloviç, zëvendësdrejtor i spitalit në Mitrovicën e Veriut, Igor Zaporozhac, kryetar i Komunës paralele serbe në Mitrovicën e Veriut, Tanja Vujoviç, dekane e Fakultetit Ekonomik, dhe Dragana Antonijevç, ish-deputete në Kuvendin e Kosovës dhe drejtoreshë e Qendrës së Studentëve në Mitrovicën e Veriut.

Seancën e drejtoi ish-kryetari i kësaj partie, Goran Rakiç dhe nënkryetarët Igor Simiç dhe Slavko Simiç.

Lista Serbe e cila vendimet politike i merr gjithmonë në koordinim me Qeverinë e Serbisë, bëhet me kryetar të ri pak ditë pasi ish-kryetari Rakiç tha se do të marrin pjesë në zgjedhjet e jashtëzakonshme lokale në katër komunat veriore.

Për organizimin e zgjedhjeve të reja në Veri të Kosovës, qeveria përmes Ministrisë së Administrimit të Pushtetit Lokal që drejtohet nga Elbert Krasniqi, ka marrë vendim për nismën e shkarkimit të katër kryetarëve shqiptarë në komunat Veriore, përmes një peticioni.

Ky vendim vjen pas marrëveshjes së arritur në Bratislavë të Sllovakisë, në takimin në mes të zëvendëskryeministrit të Kosovës, Besnik Bislimi dhe të Dërguarit Special të BE-së për dialogun Prishtinë-Beograd, për shtensionimin e situatës në Veri, pas tensioneve të krijuara atje që nga 26 maji.

Mirëpo, ky proces ka mbetur në hije pas sulmit terrorist në Banjë të Zveçanit, ku një grup terroristësh më në krye kriminelin Milan Radojiçiç, sulmoi Policinë e Kosovës.

“Lista Serbe s’i përfaqëson serbët e Kosovës – kërkesa për zgjedhje shenjë se ata janë të dëshpëruar”  

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.