Zjarri në Prevallë – Parku Kombëtar Sharri: Na duhet ndihma e KFOR-it e FSK-së, situata alarmante, ka rrezikshmëri të lartë

Park Kombëtar Sharri, i cili merret me mbikëqyrjen e fshatit turistik, Prevalla, ka kërkuar ndihmën e institucioneve të Kosovës për shuarjen e zjarrit, i cili të enjten ka kapluar një pjesë të malit të Oshlakut.

Situata aktualisht, sipas Parkut Kombëtar të Sharrit, është alarmante.  

“Për shkak të konfiguracionit të terrenit me rrezikshmëri të lartë, në pamundësi të intervenimit nga toka, ftojmë të gjitha institucionet si KFOR-i, FSK-ja dhe institucionet relevante për intervenim nga ajri me Helikopter”, thuhet në reagimin e tyre.

Në të kundërtën, sipas tyre, gjendja me zjarret po merr përmasa katastrofale dhe me rrezikshmëri të lartë.

Albanian Post gjatë ditës raportoi për kaplimin nga zjarri i një pjese të konsiderueshme të malit Oshlak, i cili është jo shumë larg vendbanimeve.

Siç mësoi Albanian Post, zjarri ka kapluar edhe pishat e zeza në malin Oshlak, të cilat frekuentohen nga turistët për arsye shëndetësore.

Zjarrfikësit kanë filluar lokalizimin e zjarrit, por vetëm me sasi të vogla të ujit, pasi rruga është e padepërtueshme për automjetet e zjarrfikësve.

Kjo pjesë e malit Oshlak, siç thonë banorët e fshatit turistik të Prevallës për Albanian Post, po kaplohet nga zjarri në tre katër ditët e fundit.

“Zjarrfikësit dhe anëtarët e Parkut Kombëtar kanë arritur ta ndalin zjarrin këto ditët e fundit, por sot në mëngjes zjarri ka filluar përsëri. Sipas vlerësimit tim zjarri është i qëllimshëm, zjarrfikësit po arrin ta ndalin zjarrin në mbrëmje, ai në mëngjes po shfaqet përsëri”, ka thënë një banor i fshatit turistik të Prevallës për Albanian Post.

“Në rast se zjarri te pishat e zeza nuk ndalet atëherë mund të rrezikohet edhe vetë fshati i Prevallës”, alarmon banori i fshatit.

Kaplohet nga zjarri një pjesë e malit Oshlak në Prevallë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.