Zilja e derës Ring e Amazon-it është përdorur për të spiunuar klientet

Një ish-punonjës i njësisë së zileve të dyerve të Ring nga Amazon ka spiunuar klientet femra për muaj të tërë në vitin 2017 me kamera të vendosura në dhomat e gjumit dhe tualete.

Kështu ka bërë me dije Komisioni Federal i Tregtisë (FTC) në një dosje gjyqësore teksa njoftoi një marrëveshje prej 5.8 milionë dollarësh me kompaninë për shkeljet e privatësisë.

Amazon gjithashtu ka rënë dakord të paguante 25 milionë dollarë për të zgjidhur akuzat se kishte shkelur të drejtat e privatësisë së fëmijëve kur nuk arriti të fshinte regjistrimet e Alexa me kërkesë të prindërve dhe i mbajti ato më shumë se sa duhej, sipas një depozitimi gjyqësor në gjykatën federale në Seattle.

Këto janë përpjekja e fundit e agjencisë për të mbajtur përgjegjës teknologjinë e madhe për politikat që kritikët thonë se i vendosin fitimet përpara privatësisë.

Amazon, e cila bleu Ring në prill 2018, u zotua të bënte disa ndryshime në praktikat e saj.

Gjobat, që arrijnë në 30.8 milionë dollarë, përfaqësojnë një pjesë të fitimit prej 3.2 miliardë dollarësh të Amazon në tremujorin e parë.

Në ankesën e saj kundër Amazon të paraqitur në shtetin e Washington-it, FTC ka thënë se ka shkelur rregullat për mbrojtjen e privatësisë së fëmijëve dhe rregullat kundër mashtrimit të konsumatorëve që përdornin Alexa-n.

Ankesa thotë se Amazon u tha përdoruesve se do të fshinte transkriptet e zërit dhe informacionin e vendndodhjes sipas kërkesës, por më pas nuk arriti ta bënte këtë.

Kurse në një rast në vitin 2017, punonjësit e Ring panë video të realizuara nga të paktën 81 kliente femra dhe punonjëse të Ring duke përdorur produktet e Ring.

“I pazbuluar nga Ring, punonjësi vazhdoi të spiunonte për muaj të tërë”, ka detajuar FTC.

Sakaq, një koleg e vuri re sjelljen e keqe dhe punonjësi u pushua përfundimisht.

FTC ka thënë gjithashtu se Ring u dha punonjësve akses të pakufizuar në të dhënat e ndjeshme video të klientëve.

Dhe se “si rezultat i aksesit të rrezikshëm dhe qëndrimit të dobët ndaj privatësisë dhe sigurisë, punonjësit dhe kontraktorët e palëve të treta ishin në gjendje të shikonin, shkarkonin dhe transferonin informacionin e ndjeshëm të klientëve për qëllimet e tyre”.

Si pjesë e marrëveshjes FTC me Ring, e cila përfshin 20 vjet, Ring duhet t’u zbulojë klientëve se sa akses në të dhënat e tyre ka kompania dhe kontraktorët e saj.

Në shkurt 2019, Ring ndryshoi politikat e saj në mënyrë që shumica e punonjësve ose kontraktorëve të mund të aksesonin videon private të një klienti vetëm me pëlqimin e atij personi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.