Policët e vrarë nga Dritan Dajti – Zhvillohet ceremonia përkujtimore e rënies së 4 Dëshmorëve të Atdheut

Në kuadër të “Vitit Mbarëkombëtar të 80-vjetorit të Çlirimit” dhe në 15-vjetorin e rënies në krye të detyrës të punonjësve të Policisë së Shtetit, të shpallur “Dëshmorë të Atdheut”, Altin Dizdari, Fatos Xhani, Kastriot Feska dhe Saimir Duçkollari, u zhvillua një ceremoni përkujtimore në qytetin e Durrësit.

Në ceremoni morën pjesë zv/ministri i Brendshëm, Andi Mahila, Drejtori i Përgjithshëm i Policisë së Shtetit, Drejtues Madhor Muhamet Rrumbullaku, drejtues të pushtetit vendor, familjarë të Dëshmorëve të Atdheut, si dhe kolegë të të rënëve dhe punonjës të Policisë së Shtetit.

Në nderim të 4 të rënëve u përurua memoriali, vepër e skulptorit Ardian Pepa, realizuar nën kujdesin e Drejtorisë Vendore të Policisë Durrës. Po ashtu, me propozim të Bashkisë së Durrësit, Këshilli Bashkiak ka vendosur emërtimin e kësaj rruge “Dëshmorët e Policisë”.

Ky akt përbën një kujtesë ndër breza për mundin, përkushtimin dhe sakrificën e çdo punonjësi policie, që ka shërbyer dhe shërben në çdo skaj të vendit për të mbrojtur jetën, pronën dhe sigurinë e qytetarëve.

Ceremonia e sotme nderoi kujtimin e të rënëve, por njëherazi ishte edhe vlerësim ndaj të gjithë atyre punonjësve të Policisë së Shtetit, të cilët ndër vite dhanë jetën në përmbushje të misionit dhe detyrës në luftë kundër krimit.

Kush është Dritan Dajti?

Dajti ka qenë një nga personat më të kërkuar në Shqipëri. Fillimisht ai u dënua me 20 vite heqje lirie nga Gjykata e Shkallës së Parë të Tiranës për veprën penale të vrasjes.

Vrasjen e tij të parë e kreu në 1999, ku mbeti i vdekur biznesmeni Agim Beqa.

Por historia e Dajtit vijon me arratisjen nga dhoma e izolimit të Gjykatës së Tiranës, më 17 nëntor 2003, vetëm pak minuta para se të fillonte seanca kundër tij.

Me anë të një pistolete që ishte lënë në tualetin e Gjykatës, ai kërcënoi policët e togës, që kishin për detyrë ta ruanin atë. Ai nuk ngurroi t’i drejtonte armën edhe prokurorit të çështjes.

Dajti u arratis, pasi hipi në një motor, që drejtohej nga një person tjetër, dhe u largua duke qëndruar gjashtë vite në arrati.

Fatos Xhani, Altin Dizdari, Kastriot Feskaj, dhe Sajmir Duçkollari mbetën të vrarë në operacionin e Policisë më 7 gusht të vitit 2009, kur efektivët e Njësisë Operacionale të Policisë së Shtetit ndërhynë në zonën e plazhit për të arrestuar Dajtin, i cili ishte në kërkim.

Gjykata e Apelit të Krimeve të Rënda e dënoi Dritan Dajtin me burgim të përjetshëm, por njëkohësisht i pranoi atij edhe kërkesën për gjykim të shkurtuar.

Ajo i dha mundësinë të kryente vetëm 25 vite burg për vrasjen e katër oficerëve të policisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.