Zgjedhjet parlamentare të 25 prillit, Celibashi: 67 numërues do të hetohen nga Prokuroria

Komisioneri Shtetëror i Zgjedhjeve, Ilirjan Celibashi, në një deklaratë për mediat të premten e 3 dhjetorit ka kallëzuar penalisht në prokurori 67 anëtarë të grupit të numërimit për zgjedhjet parlamentare të 25 prillit në Shqipëri.

“Të gjitha shkeljet që i kemi vlerësuar si shkelje të veprën së rëndë penale, ka të bëjë me diferenca në fletët e votimit apo rezultatin e votimit për kandidatin, jo për partinë”, bëri me dije Celibashi.

Sipas Komisionerit diferenca që kanë hasur për Partinë Demokratike, konkretisht kandidatin është krejt e papërfillshme dhe nuk përbën ndryshim – 1-69 në fletë votimi.

“Ne nuk jemi në kushte për të hetuar apo verifikuar përgjegjësin për këtë parregullsi. Prokuroria do të hetojë rreth kësaj”, theksoi Celibashi.

Më tej ai shtoi se për sa i përket ligjit përgjegjës janë të gjithë anëtarët që kanë numëruar votat. Grupi përbëhej nga katër persona – dy i përkisnin Partisë Socialiste dhe dy asaj Demokratike.

“Shenjat e gishti ku kanë rezultuar më shumë se dy herë kanë rezultuar me vendosjen disa herë të gishtit në pajisje. Janë 20 raste që kemi konstatuar votim të shumëfishtë. Të njëjtit persona kanë votuar në dy qendra”, vijoi ai.

Numëruesit janë nga qarqe të ndryshme të Shqipërisë, ku Tirana kryeson listën me shtatë qendra votimi.

Më 1 tetor KQZ-ja nisi rinumërimin e 520 kutive të votimit. Nga kjo u përjashtuan kutitë e votave të Qarkut të Durrësit dhe Beratit, pasi ishin rinumëruar më herët.

Nga ana tjetër rinumërimi i 10% të qendrave të votimit do t’i japte përgjigje faktit se cila ishte arsyeja e numrit të lartë të fletëve të pavlefshme – mbi 83 mijë votave.

Qëllimi i rinumërimit të këtyre kutive nuk ishtë për të ndryshuar rezultatin e zgjedhjeve, por për të identifikuar problemet që u hasën në zgjedhjet e 25 prillit.

Këto të fundit i fitoi Partia Socialiste, për të tretin mandat radhazi e cila krijoi e vetme mazhorancën parlamentare, duke lënë pas Partinë Demokratike e cila përbën opozitën parlamentare së bashku me Lëvizjen Socialiste për Integrim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.