Zgjedhjet në Kosovë

Zgjedhjet në Kosovë: Video-dëshmitë që çuan në rivotim në Han të Elezit


Mehmet Ballazhi, kandidat i PDK-së për kryetar komune në Han të Elezit, shihet në një qendër votimi

Komuna e Hanit të Elezit do të përsëris edhe një herë procesin e votimit për Kryetar Komune.

Kjo, pas vendimit që Paneli Zgjedhor për Ankesa dhe Parashtresa (PZAP), ka marrë pas takimit të mbajtur këtë të enjte.

Ankesa në PZAP kishte bërë Rufki Suma, kandidat i pavarur, për kryetar komune në këtë qytet, ku ndër të tjera ai kishte paraqitur një CD me disa video ku kandidati për kryetar komune të PDK-së, Mehmet Ballazhi, është parë duke vizituar të gjitha qendrat e votimit në këtë komunë.

PZAP erdhi deri te ky vendim pasi fillimisht Rufki Suma paraqiti ankesë kundër Partisë Demokratike të Kosovës “për presion ndaj votuesve”.

Rufki Suna, kandidat i pavarur për kryetar komune nga Hani i Elezit, ka thënë për Albanian Post se ai është ankuar në PZAP, pasi që kundër kandidati i tij ka thyer ligjin zgjedhor në ditën e zgjedhjeve.

“Ne kemi bërë një ankesë dhe kemi njoftuar PZAP-në se kandidati i PDK-së, Mehmet Ballazhi, ditën e votimeve ka hy në të gjitha qendrat e votimit dhe në të gjitha vendvotimet, gjë që e ka të ndaluar ta bëj”.

“Ai ka votuar në vendvotimin e tij, por më pas gjatë gjithë ditës ka vizitituar të gjitha vendvotimet bashkë me disa kandidat për këshilltarë, kinse për ti vizituar”.

“Ditën e zgjedhjeve ne kemi njoftuar edhe PZAP-në edhe Policinë e Kosovës”, ka treguar Suma për Albanian Post.

“Këtë e ka pohuar edhe vet ai, e kam pa në një medie online ‘ka thënë që po kam qenë me vizituar në cilësinë e kryeshefit të shtabit zgjedhor’”, ka treguar më tej Suma.

Pas këtij vendimi, dhe pas procesit të ri zgjedhor, i cili ende nuk është caktuar se kur do të mbahet, Suma beson se do të dal fitues.

“Besoj që ndryshon në favorin tim, sepse përqindja e diferencës është shumë e vogël, rreth 1% e votave”.

Albanian Post ka provuar të kontaktoj edhe Degën e PDK-së në Han të Elezit, por zyrtari për medie i kësaj partie në këtë komunë, ka thënë se janë të zënë në mbledhje dhe nuk mund të lajmërohen.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore