Sport

Zgjedhjet në FSHF, Sokol Kushta: Presidenti ka katër vjet që përgatitet për një ditë


Sokol Kushta, një prej legjendave të futbollit shqiptar ka komentuar përplasjen mes kryetarit të Bashkisë së Tiranës, Erion Veliaj dhe presidentit të Federatës Shqiptare të Futbollit (FSHF), Armand Duka.

Në një intervistë të dhënë për të përditshmen sportive shqiptare “Panorama Sport”, Kushta ka theksuar se pavarësisht të drejtës së Dukës për të kandiduar në këto zgjedhje (të 2 marsit), mënyra se si po veprohet nga ana e FSHF-së është e gabuar.

“Patjetër që presidenti ka të drejtën e zotit të garojë. Por mënyra se si do të organizojë këto zgjedhje është e gabuar, pasi ai ka katër vjet që përgatitet për një ditë, kurse të tjerët kanë një ditë të mendojnë për kater vjet”, tha Kushta.

“Duhet që para tre muajsh presidenti bashkë me asamblenë të kishin ndaluar dhe t’i kishin afishuar emrat”.

“Tjetra, nëpër salla janë parë të gjithë këta persona kur votohet, si mund të jetë i barabartë votimi?”

“Tjetër, presidenti bashkë me asamblenë një herë në kaq kohë shpikin formula për të zënë në kurth çdo garues. Mendoj se kjo është arsyeja që në tri edicionet e fundit s’ka kundërshtarë, ose janë vënë nga presidenti vetë”, theksoi ai.

Duke vijuar më tej, 57-vjeçari tha se i dukej e drejt ndërhyrja e Veliajt në këtë çështje, pasi futbolli shqiptar është mbajtur për vite me radhë nga bashkitë.

“Unë do t’ju pyesja ju, a ka një njeri që të dalë dhe të thotë që futbollin për 22 vjet nuk e kanë mbajtur bashkitë”, theksoi Kushta.

“Dhe po të ishte Federata që në vitin 2006 la të bashkëpunonte me qeverinë për privatizimin e ekipeve dhe bashkitë mos të paguanin më, të liheshin ekipet të lira që të bliheshin, të garantoj që kampionatet kombëtare nuk do të zhvilloheshin më”.

“Tjetra, sa herë ka ndërhyrë bashkia e Tiranës për të shpëtuar Tiranën nga falimentimi? Gjë që Partizani nuk e kishte këtë privilegj, nuk e kishte as Dinamo”.

“Si mos të kërkojë llogari kryetari i bashkisë për aksionet e veta? Po kur Federata kërkonte stadiumin, toka e kujt ishte? Po te qendra e Dinamos, kush ia dha terrenet FSHF-së?”, tha ish-lojtari i Kombëtares së Shqipërisë.

Për Kushtën ka vetëm një mënyrë për të fituar futbolli “duhet gjetur një formë bashkëpunimi midis qeverisë qendrore, asaj lokale dhe Federatës. Vetëm kështu fiton futbolli. Mos të harrojmë që presidenti erdhi i mbështetur nga politika dhe kur kanë dashur e kanë afruar dhe kur nuk e do, i drejtohesh UEFA-s dhe FIFA-s.”

Ish-sulmuesi i Flamurtarit nuk la pa përmendur edhe meritat e Dukës, duke thënë se “mos të jemi dhe të padrejtë. Duka solli një reformë në federatë. E organizoi dhe e bëri institucion”.

Por, nga ana tjetër, Kushta shton edhe se “Duka është një manaxher, tregtar i mirë. Por gjithashtu la shumë vend për abuzime”.

“Një gjë e bukur ishte kualifikimi në Europian. Nuk më vjen mirë kur dëgjoj që ishte zotësia e Dukës që vajtëm në europian. Dhe këtu lë vend për abuzim”, përfundoi legjenda e futbollit vlonjat.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore