Zgjedhjet e Jashtëzakonshme në Veri

Këtë të diele do të mbahen zgjedhjet në katër Komuna në Veri të Kosovës. Si zakonisht vendvotimet do të hapen në ora 7:00 dhe do të mbyllen në ora 19:00.

Në këto zgjedhje nuk do të marrë pjesë partia më e madhe serbe në Kosovë, Lista Serbe.

Shumica e vendvotimeve do të jenë në disa kontejnerë të improvizuar, e të cilët janë vendosur për arsye sigurie, të paktën kështu kanë bërë me dije institucionet e Kosovës.

Për pjesëmarrje në këto zgjedhje për kryetar të komunave, Komisioni Qendror Zgjedhor i ka certifikuar 11 kandidatë, ndërsa në zgjedhjet për dy kuvendet komunale më shumë se 60 sosh.

Subjektet në garë janë Iniciativa qytetare Mitrovica, Partia Demokratike e Kosovës, Partia e Serbëve të Kosovës, Lëvizja Vetëvendosje, si dhe një kandidate e pavarur.

Nga KQZ u bënë të ditur edhe të gjitha vendvotimet ku mund ta ushtrojnë të drejtën e tyre kushtetuese qytetarët e asaj zone të Kosovës.

Ndërsa, të shtunën një ditë para zgjedhjeve, kryetari i Komisionit Qendror të Zgjedhjeve (KQZ), Kreshnik Radoniqi, bëri të ditur se institucioni të cilën ai drejton është gati për zgjedhjet e jashtëzakonshme në katër komunat veriore që pritet të mbahen më 23 prill të dielën.

“Në emër të KQZ-së unë ftoj të gjithë qytetarët e Veriut që ta shfrytëzojnë të drejtën e tyre për të dalë në zgjedhje dhe në këtë formë të zgjedhin përfaqësuesit e tyre legjitim dhe të ndërtojnë institucionet demokratike”, tha Radoniqi.

Çfarë thanë krerët e shtetit për zgjedhjet?

Presidentja e Kosovës, Vjosa Osmani, përmes një komunikate për media, u ka bërë thirrje serbëve të Kosovës të shfrytëzojnë të drejtën e tyre demokratike dhe të dalin e të votojnë më 23 prill në zgjedhjet e jashtëzakonshme për katër komunat veriore.

“E drejta e votës është e garantuar me Kushtetutë dhe ligje, ndaj atë e gëzojnë të gjithë qytetarët e Kosovës, pa dallim. Komunat kanë përgjegjësi të qëndrojnë afër qytetarëve, duke ofruar shërbime e projekte të cilat janë në interesin tuaj dhe të cilat zgjidhin problemet me të cilat përballeni çdo ditë. Pjesëmarrja juaj në zgjedhje do të thotë jetë më të mirë për të gjithë ju”, tha Osmani.

Ndërsa, Kryeministri i Kosovës, Albin Kurti, ka kërkuar që të gjithë serbët të shfrytëzojnë të drejtën e tyre dhe të marrin pjesë në procesin zgjedhor në katër komunat veriore të Kosovës.

“Nuk e di sa do ta bëjnë këtë, meqenëse mediat nga Beogradi i frikësojnë ata që të gjithë me programe e lajme të pavërteta”, ka thënë Kurti.

Kurti ka bërë të ditur se të gjitha institucionet përkatëse kanë bërë përgatitjet e tyre për këtë proces zgjedhore, proces i cili sipas tij nuk synon “që të thotë që gjithçka është normale atje”.

Cili ishte reagimi i Bashkësisë Ndërkombëtare?

Shtetet e Bashkuara të Amerikës do t’i njohin rezultatet e zgjedhjeve të jashtëzakonshme në katër komunat veriore të Kosovës, pavarësisht bojkotit të serbëve, kishte thënë të mërkurën emisari special i SHBA-ve për Ballkanin Perëndimor, Gabriel Escobar.

“I kam bërë thirrje serbëve që të marrin pjesë në zgjedhje. Ne i kuptojmë shumë gjëra që ata i shohin si problematike, por sigurisht që duhet të marrin pjesë në zgjedhje. Nëse ata nuk do të jenë pjesëmarrës, kjo nuk do të thotë se ne nuk i mbështesim zgjedhjet”, tha ai.

Ndërsa, Bashkimi Evropian ka bërë thirrje që zgjedhjet e jashtëzakonshme për katër komunat veriore në Kosovë të mbahen në mënyrë paqësore.

“Është e domosdoshme që zgjedhjet të mbahen në kushte paqësore dhe BE-ja fton të gjitha palët që të tregojnë përmbajtje”, ka thënë zëdhënësi i Bashkimit Evropian, Peter Stano.

Por, edhe ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës, të njohura ndryshe si QUINT-i, kishin lëshuar një deklaratë për media, ku janë rreshtuar pro mbajtjes së zgjedhjeve me 23 prill, derisa kishin shprehur keqardhje për mos-pjesëmarrjen e Listës Serbe.

“Na vjen keq që Lista Serbe nuk ka përdorur të drejtën e vetë demokratike për të marrë pjesë në këto zgjedhje”, thuhej në deklaratën e përbashkët të ambasadave.

“Zgjedhjet janë themeli i demokracisë”, shkruajnë ata, prandaj “të siguruarit se ato mbahen në mënyrë të rregullt dhe paqësore është esenciale”.

Çfarë u tha nga Serbia?

Presidentin e Serbisë, Aleksandër Vuçiç, e ka nervozuar jashtë mase mbajtja e zgjedhjeve për katër komunat në Veri të Kosovës të dielën e 23 prillit, madje ai për këtë akuzoi të gjithë botën.

“Të dielën në veri të Kosovës do të jetë një ditë e tmerrshme për demokracinë dhe një ditë e vështirë për popullin serb, ditë në të cilën zyrtarisht do të shënohet turpi i Evropës dhe i botës për atë që organizuan dhe po bëjnë”, tha Vuçiç.

Reagim të njëjte si Vuçiç, pati edhe shefi i të ashtuquajturës Zyrë për Kosovën në Qeverinë e Serbisë, Petar Petkoviç.

“Populli serb do të jetë dhe do të mbetet paqësor dhe se bashkësia ndërkombëtare mban përgjegjësinë më të madhe në përpjekjet e Kosovës për të dëbuar popullin serb në veri të vendit”, tha Petkoviç.

Lista Serbe – partia më e votuar në mesin e serbëve dhe kontrolluesit faktikt të Veriut – e cila ka refuzuar të marrë pjesë në zgjedhjet e jashtëzakonshme për katër komunat veriore, përmes një komunikate për media kishte bërë thirrje që serbët në mënyrë të organizuar të bojkotojnë këtë proces të dielën.

Për këtë Listë, serbët duhet të shikojnë me përbuzje të gjithë ata që planifikojnë të dalin dhe të marrin pjesë në zgjedhje, proces i cili sipas tyre “është i paligjshëm dhe kundër interesave të popullit serb”.

“Ftojmë të gjithë popullin serb në Veri të Kosovës që të dielën më 23 prill të qëndrojnë të qetë dhe të mos bien në provokimet e ‘regjimit’ të Albin Kurti, qëllimi i vetëm i të cilit është dëbimi i serbëve nga Veriu”, thuhej në reagimin e Listës Serbe.

Si kishte ardhur deri tek këto zgjedhje?

Zgjedhjet për katër kryetarë komunash veriore të Kosovës dhe dy asamble komunale do të duhej të mbaheshin në dhjetor të vitit të kaluar, por ato u shtynë për 23 prill të këtij vit, pas kërkesës së ndërkombëtarëve që të mos vazhdohet tutje me procedura të rregullta, meqë situata në terren nuk e mundësonte.

Nevoja për zgjedhje lindi pasi në mënyrë të organizuar Lista Serbe, partia më e madhe e serbëve në Kosovë, tërhoqi kryetarët e komunave, deputetët, ministrat dhe gjithë stafin administrativ nga institucionet e Kosovës.

Largimi nga institucionet u bë si shenjë proteste për disa shkarkime që ndodhën në radhët e policisë, përfshirë komandantin serb të stacionit në veri, meqë ata nuk i përfillen urdhrat e dhëna me vendim qeveritar, për gjobitjen e të gjitha veturave me targa ilegale “KM”.

Më pas, kur qeveria u pajtua ta shtyjë zbatimin e vendimit, Lista Serbe u deklaruar se si kusht për t’u kthyer në institucionet kanë fillimin e themelimit të Asociacionit të Komunave me Shumicë Serbe.

Kosova është pajtuar që ta themelojë Asociacionin me Marrëveshjen për Rrugën Drejt Normalizimit të Raporteve me Serbinë, por Lista Serbe prapë refuzoi të regjistrohet në Komisionin Qendror Zgjedhor për t’u futur në listë të partive që garojnë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.