“Zgjedhjet e 14 majit”, Qeveria shtyn afatin e kartave ID

Ministri i Brendshëm në Shqipëri Bledi Çuçi, deklaroi se në zgjedhjet vendore të 14 majit do të votojnë të gjithë qytetarët me të drejtë votimi, edhe nëse u ka skaduar karta e identitetit (ID).

Lajmi u bë i ditur nga zyrtari shqiptar, pas vendimeve të Këshillit të Ministrave.

“Miratuam vendimin për shtyrjen e afatit të dokumenteve të identitetit të shqiptarëve, të cilat skadojnë më 14 maj. Është një shtyrje që vjen si rezultat i një konsultimi me KQZ që mbart shqetësimet e partive politike. Duke parë numrin e madh të dokumenteve të identitetit që kanë skaduar apo skadojnë deri në datën 14 maj, vendosëm që ta shtyjmë afatin dhe në këtë mënyrë, të gjithë shtetasit mund të votojnë në datën 14 maj, pavarësisht se dokumenti i tyre i identitetit, ka skaduar”.

Shqipëria vendosi për herë të parë sistemin e kartave të identitetit në vitin 2009, pjesë e një kompromisi politik mes qeverisë së ish-kryeministrit Sali Berisha dhe Partisë Socialiste të kryeministrit aktual Edi Rama për të hequr certifikatat e lindjes si mjet identifikimi të votuesve.

Këshilli i Ministrave vendosi më herët për krijimin e kompanisë shtetërore që do të prodhojë pasaportat dhe kartat biometrike.

Tanimë, nuk do të jetë më Aleat-i që do të merret me prodhimin e pasaportave dhe kartave biometrike, por do t’i kalojë shtetit.

Çka i hap rrugën Ministrisë së Brendshme, e cila përfaqëson shtetin si pronar 100 për qind të aksioneve të shoqërisë aksionare, që të punojë për ngritjen e kompanisë shtetërore brenda 30 ditëve.

Sakaq, krijimi i kësaj kompanie do t’i kushtojë buxhetit të 20 milionë lekë.

Kujtojmë se Elbasani, Vora dhe Kamza do të jenë bashkitë ku teknologjia do të aplikohet në procesin e votimit më 14 maj për zgjedhjet vendore në Shqipëri.

Meqënëse në këto tre bashki votimi dhe numërimi do të jenë elektronik, pritet që të nxjerrin rezultatin e zgjedhjeve të parat.

Së fundmi, Komisioni Rregullator në KQZ miratoi procedurat e kryerjes së këtij procesi, që do të jetë i monitoruar nga operatorët teknikë.

Çfarë ndodh nëse hasen probleme teknike në bashkitë me votim elektronik

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.