Shqipëria

Zgjedhja e Presidentit – pse përplasen palët?


Megjithëse java që lamë pas nisi me një pakt mes mazhorancë dhe opozitës për propozimin e kandidaturave për Presidentin e ri të Republikës së Shqipërisë, raundi i sotëm do të jetë vetëm formal, pa asnjë rezultat.

Kjo pasi palët zgjodhën, që të mos paraqesin as edhe një kandidat të vetëm si emër për kreun e Shtetit.

Opozita për arsyet e saj dhe mazhoranca e cila e ka njoftuar se do të japë një emër vetëm në dy raundet e fundit, katër dhe pesë.

Fillimisht, ishte deputeti i Partisë Demokratike (PD), Arbi Agalliu, ai i cili njoftoi se grupi i demokratëve nuk do të japë asnjë emër për presidentin e ri.

Kjo, pa u pranuar dokumenti dhe propozimi i tyre.

Në draftin e PD-së, dokumenti të cilit i referohet sekretari demokrat, kërkohet që në formulën e zgjedhjes së presidentit opozita të propozojë katër emra kandidatësh.

Më pas, të arrihet në një dakordësi mes mazhorancës dhe opozitës për emrin që do t’i dërgohet Parlamentit për votim.

Por mazhoranca ka një këndvështrim tjetër për situatën e krijuar – duke hedhur dyshime se opozita nuk po gjen mes “vetes gjuhën e përbashkët”.

Deputetja e Partisë Socialiste, Ermonela Felaj, njëkohësisht nënkryetare e Kuvendit të Shqipërisë, shpjegon së pari se “lista e opozitës ishte zhgënjyese”.

Ajo në një prononcim për Albanian Post thekson se, cilësimi nuk ka të bëjë me askënd personalisht nga të listuarit, por se sipas saj “opozita nuk del jashtë qerthullit të atyre që i konsideron si të vetët”.

“Atëherë si mund te gjesh konsensus midis të mive dhe të tuve? Kur folëm për Presidentin jopolitik kishim parasysh mos identifikimin me një force politike”, thotë Felaj.

Për të, mosparaqitja e asnjë kandidati e bën të dyshoj fort dhe njëherë se, “nuk gjejnë gjuhë as për një të vetëm, midis të paktën 20 deputetëve”.

Raundi i tretë

Kështu mes përplasjeve ditën e sotme pritet të vendoset datat për mbledhjen e Konferencës së Kryetarëve, e cila ka si detyrë caktimin e raundit të tretë

Në raundin e tretë të negociatave me mazhorancën, në total opozita do të prezantojë katër emra.

Përkatësisht dy nga grupi i Enkelejd Alibeaj dhe dy të tjerë nga Grupi Parlamentar i Aleancës për Ndryshim dhe Grupi për Demokraci dhe Integrim i Mesila Dodës.

Ndërkohë prej këtyre emrave dy do të zgjidhen nga socialistët. Pas kësaj do të krijohet një grup i përbashkët prej gjashtë anëtarësh, në përbërje të së cilit do të jenë nga PD-ja dhe PS-ja.

Nga ky grup do të dalë një kandidat – i propozuar me firma të përbashkëta PD-PS – që do të dërgohet për miratim në Kuvendin e Shqipërisë.

Kujtojmë se raundi i parë i votimeve u përmbyll pa asnjë kandidat. Raundi i dytë është parashikuar të zhvillohet të hënën e 23 majit.

Nga ana tjetër Kushtetua parashikon se procedurat për zgjedhjen e Presidentit duhet të fillojnë jo më vonë se data 23 maj.

Procesi i zgjedhjes së presidentit

Procesi për zgjedhjen e Presidentit kalon në pesë raunde. Në tri raundet e para, ai duhet të zgjidhet me tri të pestat e votave – pra 84 vota.

Kushtetuta parashikon se nëse në fund të tri raundeve nuk kemi një president atëherë Kreu i Shtetit zgjidhet me 71 vota.

Sipas saj, socialistët mund ta zgjedhin vetë presidentin në raundin e tretë.

Shumica e kërkuar është e thjeshtë, 71 vota pro dhe ata i kanë me formatimin e parlamentit.

Presidenca e shtatë në Shqipëri do të përmbyllet më 24 korrik të vitit 2022.

Në krye të shtetit që prej 2017-ës është Ilir Meta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore