Zgjatja e organeve të Vetting-ut/ Miratohet nga Këshilli i Legjislacionit, fjala e fundit Kuvendit

Mes debatesh Këshilli i Legjislacionit të premten e 21 janarit ka miratuar ndryshimet kushtetuese për sa i takon zgjatjes së mandatave të organeve të Vetting-ut deri në fund të vitit 2024.

Relatorja e Partisë Socialiste, Klotilda Bushka solli argumentet pro zgjatjes së saj duke theksuar se, “vlerësojmë se nisma është në përputhje me kushtetutën, ka një interes legjitim në të mirë të reformës në drejtësi dhe arrijmë në përfundimin se kjo nismë të miratohet”.

Ajo përmendi faktin se nisma është konsultuar me aktorë të shoqërisë dhe akademikë si Aurela Anastasi, Erind Mërkuri dhe Silva Caka.

Por deputetja e opozitës së Lëvizjes Socialiste për Integrim, Erisa Xhixho, ishte kundër duke arsyetuar se për ndryshime të tilla Kushtetuese duuhet të kalohen me referendum.

“Iniciativa të tilla janë jo vetëm jashtë asaj që do të dëshiroja të ndodhte në këtë moment ku është arnuar pa fund kushtetuta, duke u trajtuar jo si ligj themeltar i shtetit, por as si ligj i thjeshtë me gjithë respektin dhe peshën që duhet të ketë në vendin tonë”.

Sipas saj e gjitha kjo i, “duket një luftë për të ndryshuar sa më shpejtë kushtetutën”.

“Ne e mbështesim zgjatjen e mandatit për institucionin, por nuk mund të flasim për zgjatje afati të personave që janë anatemuar në dhënin e drejtësisë, qoftë të dy standardeve”, theksoi Xhixho në fjalën e saj.

Ndërsa, Partia Demokratike nuk ishte e pranishme në mbledhjen e Këshillit.

Tashmë fjala e fundit i takon Kuvendit të Shqipërisë, i cili duhet të miratojë këto ndryshime me 84 vota pro.

Zgjatja e mandatit të vetting-ut

Ishte data 15 tetor, kur PS-ja depozitoi në Kuvend kërkesën për zgjatjen e mandateve të Vetting-ut.

PS-ja kërkoi që afatet e Komisionit të Pavarur të Kualifikimit dhe Kolegjit të Posaçëm të Apelimit të shtyhen deri në 2024-ën.

Kreu i Grupit Parlamentar të PS-së, Taulant Balla, në daljet e tij për mediat ka deklaruar se kjo është një vijueshmëri e Reformës në Drejtësi.

Balla ka ftuar herë pas here opozitën për të votuar sa më parë për ndryshimet kushtetuese që kishin të bënin me zgjatjen e afateve të organeve të Vetting-ut

Një zë lobues për zgjatjen e Vetting-ut ka qenë edhe ambasadorja e SHBA-ve në Shqipëri, Yuri Kim. 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.