Zëvendëskryeministri i Malit të Zi, Nik Gjeloshaj, vjen në Kosovë për 16 vjetorin e pavarësisë
Nik Gjeloshaj, zëvendëskryeministri shqiptar në Qeverinë e Malit të Zi, do të marrë pjesë në ceremoninë e festimit të ditës së pavarësisë së Kosovës, më 17 shkurt, në përvjetorin e 16-të.
Lajmi është bërë i ditur nga vetë Gjeloshaj përmes një postimi në Facebook.
“Në mbledhjen e sotme Qeveria aprovoi platformën qe të vizitoj Kosovën dhe të marr pjesë në kremtimin e Ditës së Pavarësisë së Kosovës”, shkroi ai.
Mali i Zi, theksoi ai, e ka njohur pavarësinë dhe vazhdon të ketë bashkëpunim shtetëror me Kosovën.
Politikani shqiptar në Mal të Zi, bëri të ditur se ftesa për pjesëmarrje në ceremoninë e festës së pavarësisë është dërguar nga presidentja Vjosa Osmani, kryeministri Albin Kurti dhe Kryetari i Kuvendit, Glauk Konjufca.
“Kjo konfirmon vazhdimin e bashkëpunimit të ngushtë dhe marrëdhënieve të mira fqinjësore midis dy shteteve”, pohoi ai.
Në emër të Qeverisë së Malit të Zi, shtoi Gjeloshaj, “do të uroj 16 vjetorin e pavarësisë drejtueseve dhe qytetarëve të Republikës së Kosovës”.
Kosova dhe Mali i Zi kanë qenë vende përbërëse në kuadër të Jugosllavisë, por me statuse të ndryshme.
Mali i Zi ka qenë një nga gjashtë republikat e Federatës Jugosllave, ndërsa Kosova ishte krahinë autonome në kuadër të Serbisë, dhe kjo deri në vitin 1989, kur presidenti fashist i atëhershëm serb, Sllobodan Millosheviç e suprimoi atë.
Mali i Zi është vendi i fundit që është shkëputur nga Jugosllavia, dhe kjo jo më larg se në vitin 2006. Lëvizjen për shkëputjen nga Jugosllavia e kishte udhëhequr ish-presidenti malazez, Milo Gjukanoviç.
Kur Kosova e shpalli pavarësinë e saj, me 17 shkurt të vitit 2008, Mali i Zi vetëm disa muaj më pas, saktësisht me 9 tetor 2008, e kishte njohur pavarësinë e saj. Kryeministër në atë kohë ishte Gjukanoviç.
Njohja nga Mali i Zi për Kosovën ishte mjaft e rëndësishme, pasi që një vend fqinje po pajtohej me mëvetësinë e saj. Ishte vendi i 49 që e kishte njohur pavarësinë e Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Ekskluzive: Franca kërkon shtyrje të vendimit për anëtarësim të Kosovës në KiE
-
Meta thotë se Rama dhe Veliaj janë përfshirë në fushatë në Maqedoninë e Veriut, jo Kurti
-
Publikohet dokumenti i armëpushimit që Hamasi e pranoi, por Izraeli e refuzoi – 3 faza në 3 muaj
-
Lajçak pret përgjigje konstruktive nga Kosova e Serbia mbi kompromisin e propozuar për dinarin