Jurgen Stock, Sekretari i Përgjithshëm i INTERPOL-it, ka thënë se nuk mund të ketë zhvillim të një vendi pa siguri.
Sipas tij, rezultati i arritur nga Shqipëria për zero krime apo incidente që lidhen me emigrantët, është një rezultat i jashtëzakonshëm.
Stock, gjatë konferencës së 51-të Rajonale të INTERPOL-it, që po zhvillohet në Tiranë, ka ravijëzuar se angazhimi dhe shpejtësia me të cilën Policia shqiptare bashkëpunon me INTERPOL-in duhet të jetë shembull edhe për vendet e tjera.
“Urime për faktin se ka patur zero incidente apo krime fatale në drejtim të turistëve. Është një sukses i jashtëzakonshëm dhe një lajm shumë i mirë për ata që po planifikojnë të vizitojnë Shqipërinë, apo të investojnë në Shqipëri. Këto janë dy anët e medaljes. Siguria dhe zhvillimi, pra s’ka zhvillim pa siguri”, ka thënë Stock.
“Dua të uroj ministrin dhe Policinë e Shtetit për suksesin e jashtëzakonshëm. Ky rezultat thekson dhe atë që tha ministri, rëndësinë që ai dhe lidershipi mundëson tek besimi i punës së INTERPOL në Shqipëri”.
Gjithashtu Stock ka vlerësuar pozitivisht rolin që ka luajtur Policia shqiptare në dekadën e fundit në identifikimin e kriminelëve, shkëmbimin e informacioneve dhe parandalimin e krimeve ndërkufitare.
Ai ka thënë se INTERPOL-i është i ndërgjegjshëm prej mbi 100 vitesh se krimi është çështje jo vetëm e një vendi.
“Sot kemi internetin, që mundëson që të kemi një botë ku krimi të gjendet në të gjitha vendet e Evropës dhe që buron nga të gjitha anët. Ja pse INTERPOL para 100 e pak vitesh dhe deri më tani lufton për të ndaluar këtë, pasi e dimë që s’ka vende të pasigurta nga kriminelët. Shqipëria bën rolin e saj në luftën ndaj drogave, emigrantëve të paligjshëm”, ka thënë ai.
“Shpresoj që të gjitha vendet anëtare të INTERPOL të jenë po aq aktive sa Shqipëria dhe Policia e Shqipërisë në shkëmbimin e informacionit dhe që çon në suksesin dhe arrestimin, goditjen e grupeve kriminale, dhe konfiskimin e aseteve me burime kriminale dhe në ndalimin e pandëshkueshmërisë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
