Zemaj: Reforma në shëndetësi vetëm me fjalë, degradim me rezultatet

Sipas ish-ministrit të Shëndetësisë, Armend Zemaj, në sektorin e Shëndetësisë reforma është duke ndodhur vetëm me fjalë.

Ai gjatë një interviste për Albanian Post thotë se që nga udhëheqja e këtij dikasteri nga Lëvizja Vetëvendosje ka pasur vetëm dështime.

“Reformë me fjalë e degradim me rezultatet. Thënë të drejtën nuk e di për çfarë reforma është fjala sepse dështimi dhe reforma nuk qëndrojnë së bashku”.

Ai tutje ka theksuar se ekzekutivi deri tani ka arritur të miratoj vetëm një projektligj në lexim të parë.

“Ministria e Shëndetësisë në agjendën legjislative ka planifikuar miratimin e tetë ligjeve për këtë sesion të Kuvendit, ndërsa ka arritur të miratoj vetëm një projektligj në lexim të parë”.

“Projektligjin për çmimin e produkteve medicinale, edhe atë me votat e opozitës, konkretisht të LDK-së. Reformat nuk bëhen pa miratimin e ligjeve te reja dhe ndryshim-plotësimin e atyre ekzistuese, fjala reformë është fjala më e përdorur e pushtetit aktual që shërben për të mbuluar paaftësinë në vendimmarrje e qeverisje”.

Edhe për emërimet që bëhen në Qendrën Klinike Universitare të Kosovës (QKUK), ai thotë se bëhen në mënyrë politike.

“Kapja e madhe e institucioneve të shëndetësisë nuk ka të ndalur. Listat e pritjes nuk zvogëlohen me shkarkime dhe emërime puro politike”.

“Ndryshimet të cilat po ndodhin edhe në SHSKUK, edhe në klinika të ndryshme janë kryesisht të karakterizuara haptazi me një tendencë të pushtetit për kontroll politik të secilit veprim dhe secilit vendim, duke cenuar edhe funksionimin e përditshëm të sistemit spitalor”.

Ndër të tjera, Zemaj ka përmendur edhe një shembull për këtë.

“Shembulli më i mirë për këtë flet fakti se si sekretari permanent i MSH-së emërohet gjithashtu edhe kryesues bordi në SHKUK, do të thotë kemi përzierje kompetencash, nuk dihet kush kujt i raporton, ata njëri-tjetrit, e ndonjëherë edhe vetes”.

Ndërsa pohon se nuk sheh ndonjë hap pozitiv për ndryshim në sektorin e Shëndetësisë nga kjo qeverisje.

“Nuk shoh vullnet të mirë për ndryshime pozitive madje të jem krejt i sinqertë pa dashur të tingëllojë pesimist, nuk kam asnjë pritje se mund të ketë ndryshime, sepse qasja e pushtetit nuk jep shpresë për ndryshime pozitive”.

“Shëndetësia u shkatërrua që tre vjet me Vetëvendosjen”, ish-ministri i Shëndetësisë intervistë për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.