Zelensky – Komediani, Presidenti, Heroi i Ukrainës

Natën, ai hodhi në rrjet një video “selfie”, së bashku me drejtues të Qeverisë së tij. Në mëngjes, doli i vetëm rrugëve të Kievit, thuajse i buzëqeshur.

“Unë nuk iki. Do të mbroj vendin tim”.

Sa komike do të ishte, nëse Volodymyr Zelensky, do t’i bënte këto skeçe disa vite më parë, kur ai ishte një komedian në një spektakël televiziv dhe mbartte rolin e Presidentit të Ukrainës?

Ndoshta, po aq sa sot, kur detyrën e parë të rëndësishme politike në karrierën e tij të shkurtër, do ta kishte si President i Republikës.

“Shërbëtori i Popullit”, ishte seriali i prodhuar nga Kvartal 95, një kompani kinematografike, ku edhe Zelensky luante rolin komik.

“Shërbëtori i Popullit”, është lëvizja të cilën Zelensky e krijoi me punonjës të Kvartal 95 në mars 2018 dhe me të cilën, ai mori mandatin presidencial – atë real – në vitin 2019.

Me 73.2% të votave, Zelensky mundi një ndër figurat më influencuese të politikës ukrainase në dekadën e fundit, Petro Poroshenko.

Ky aprovim, nuk i mbeti shumë në këmbë, deri përpara fillimit të bombardimeve ruse.

Administrata e Joe Biden, kishte kohë që lajmëronte se Rusia, do të sulmonte. Zelensky vetë, i merrte parasysh, por publikisht, nuk i jepte rëndësinë e duhur sipas percepsionit publik.

Disa opozitarë madje, thonin se ai po i shpërfillte detajet.

Ndërkombëtarët, gjithashtu, patën filluar ta kritikonin, pasi vetë Zelensky, i kritikonte ata, si në rastin e lëvizjes së selive diplomatike në Lviv nga amerikanët apo britanikët.

“Ai është gjithnjë dy ose tre hapa prapa. Këshilltarët nuk i japin këshilla fort të mira”, do të thonin zyrtarë të huaj.

Gjithsesi, kur lufta u shfaq në derë, ai u soll me guxim dhe vendosmëri, në orët ndoshta më të errëta të Ukrainës dhe gjithë Evropës, që prej Luftës së Dytë Botërore.

Dy ditë pas luftimeve, turqit i dërguan një avion për ta evakuuar. Amerikanët i ofruan largim nga vendi po ashtu.

“Nuk më duhet një fluturim për të ikur nga vendi. Na duhen armë për të luftuar!”.

Komediani, nuk bën më shaka dhe buzëqeshjen, nuk e ka më aq të dëlirë, si kur ishte kinse president.

Familjen, sipas tij dhe inteligjencës ukrainase, ia kanë kërcënuar, ashtu si edhe atë vetë.

Familjen, po sipas tij dhe inteligjencës ukrainase, ia kanë strehuar në një vend sekret të sigurt.

Ai vetë, gjezdis kur mundet rrugëve të Kievit, për t’i dhënë kurajë qytetarëve. Pjesën tjetër të luftës, e kalon në takime me drejtuesit ushtarakë dhe në telefon me homologët e huaj.

Fati i tij në ditët në vijim, nuk është i qartë. Vladimir Putin, duket i vendosur për ta shtënë në dorë Kievin dhe për ta kthyer në një kartë negociuese.

Ndërsa, numri një i Ukrainës, është qesharakisht i qetë.

Folësi natyral i gjuhës ruse, ia tregoi siberianëve se nuk kishte frikë nga situata, vetëm një natë para agresionit.

Me prejardhje hebree, paraardhësit e Zelenskyt, kanë qenë ndër viktimat e holokaustit. Gjyshi i tij madje, pati luftuar kundër ushtrisë së Hitlerit, kur Gjermania kërkoi ta pushtonte Kievin, i cili qëndroi heroik në mbrojtjen e territorit deri në pikën e fundit.

Sot, është ai, i cili nuk po lufton ndaj Hitlerit, por ndaj një politikanë, të cilin shumë e krahasojnë me çmendurinë e Fuhrer-it.

Fuqia bruto ushtarake e Kremlinit, ndoshta edhe mund të dalë triumfuese në fund.

Por, vendi i Zelensky-t, me vetëm tre vjet politikë, i ka kaluar historisë, si lideri i cili me shtetin nën zjarr, po lufton jo vetëm për mbijetesën e tij, por për atë të një kombi prej 44 milionësh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.