Zaev nuk shkon në Beograd për “Open Balkans”, po caktohet dikush tjetër

Zyra e Kryeministrit të dorëhequr, Zoran Zaev, ka konfirmuar se ai nuk do të merrë pjesë në takimin e paracaktuar për Open Balkans në Beograd, mes liderëve të kësaj nisme rajonale.

Zyra e Kryeministrisë së Maqedonisë së Veriut ka lajmëruar se një përfaqësues tjetër i Maqedonisë së Veriut do të merrë pjesë në takim, por se ende nuk është përcaktuar se kush do të merrë pjesë.

Fillimisht ishte planifikuar që kryeministrat Shqipërisë dhe Maqedonisë së Veriut, Edi Rama dhe Zoran Zaev të vizitonin Serbinë më 3 dhe 4 nëntor, në një takim për nismën e Ballkanit të Hapur.

Ndërkaq Presidenti i Serbisë, Aleksandër Vuçiç ka publikuar një fotografi me Kryeministrin e Shqipërisë, Edi Ramën, ku që të dy po marrin pjesë në Samitin e Liderëve për Ndryshimet Klimatike në Glasgow.

“Mbështetje të fuqishme për Open Balkans. A duhet ta mbajmë apo ta shtyjmë takimin në Beograd, për shkak të ngjarjeve në Shkup?”, shkroi Vuçiç në Instagram.

Edi Rama, dhe tashmë Kryeministri i dorëhequr i Maqedonisë së Veriut, Zoran Zaev, kishin planifikuar vizitë në Beograd me 3 dhe 4 nëntor, për të diskutuar për inicativën rajonale Open Ballkans.

Ndërsa për shkak të rezultateve të dobëta zgjedhore, mbrëmjen e së dielës, Zaev u dorëhoq nga posti i shefit të ekzekutivit maqedonas, si dhe nga posti i kryetarit të partisë së tij.

Ndërkaq, Edi Rama dhe Aleksandër Vuçiç e nisën takimin me Emanuel Macron në një mënyrë të pazakontë duke “trokitur mbi dru”.

Sipas disa traditave të vjetëra evropiane “trokitja mbi dru” shprehë një dëshirë që diçka të ndodhë ose të mos ndodhë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.