![](https://albanianpost.com/wp-content/uploads/2024/01/talat-xhaferi.png)
Kryeministri shqiptar i Maqedonisë së Veriut, Talat Xhaferi, ka thënë se rajoni i Ballkanit Perëndimor është “fragjil” sa i përket situatës së sigurisë, duke theksuar se situata mund të dalë lehtë prej kontrollit.
Këto komente, Xhaferi i ka bërë në një intervistë për “A2 CNN”, duke folur për sulmin terrorist në Banjë të Zveçanit, por edhe për kërcënimet e vazhdueshme të Serbisë ndaj Kosovës.
“S’do mend që rajoni në përgjithësi është fragjil, pra mund të dali situata nga kontrolli shumë lehtë, nuk duhet shumë punë për të ardhur në një situatë që elementi forcë të vie në shprehje, kështu që u takon institucioneve të Kosovës të jenë në nivel”, ka deklaruar Xhaferi.
“S’do mend që ne që jemi përreth në kontekstin e nevojave për sigurinë e vendeve përkatëse duhet të jemi në gatishmëri në kuptimin e përcjelljes së situatës dhe bashkërendimit të veprimeve që duhet t’i kemi bashkërisht”, shtoi.
Kryeministri i Maqedonisë së Veriut theksoi se për sigurinë në rajon NATO është garant, pasi që një numër i madh i vendeve të Ballkanit Perëndimor janë pjesë e Aleancës, por megjithatë nuk përjashtoi mundësinë e veprimeve individuale të shteteve që mund të trazojnë situatën, siç është Serbia.
“Siguria në Ballkan, duke pasur parasysh KFOR në Kosovë, pa qenë anëtar i NATO-s, duke pasur parasysh që gjithë vendet përreth janë anëtarë e NATO, përjashto Serbinë, Bonje e Hercegovinën dhe Kosovën janë garant për atë çka nënkupton siguria ndërkombëtare në nivel të vendeve sa i përket obligimit të përbashkët”, pohoi ai.
“Por s’do mend që çdo vend individualisht, duke pasur parasysh aspektet e asaj që shohim dhe deklarohen nga Serbia është sinjal për gjithë ne që situata nuk është si mendojmë ne në rrafshin politik, por mundësia për një shpërthim ekziston gjithmonë, prandaj duhet të jemi vigjilentë”, shtoi.
Jo rastësisht, nënvizoi Xhaferi, “ne jemi pjesë e koalicionit evropian në sanksionet kundër Rusisë, përjashto Serbinë”, e cila vepron ndryshe nga vendet e perëndimit në këtë çështje dhe jo vetëm.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com