Sport

Xavi: Gara për titull është ende e hapur


Barcelona triumfoi në El Clasico përballë Real Madrid, duke bërë kështu një hap para drejt titullit kampion, pasi që tani udhëheq tabelën me plus 12 pikë nga madrilenët.

Megjithatë, pavarësisht distancës me ndjekësin më të afërt, trajneri i katalanasve, Xavi Hernandez, ka thënë se ende është herët të flitet për çështjen e titullit kampion.

“Nuk ndihemi ende kampionë, por është një hap shumë i rëndësishëm për ne. Ndeshja ishte e përkryer dhe ne e merituam fitoren”, tha Xavi.

“Ishim superiorë dhe lojtarët e meritonin këtë sukses, jo vetëm për atë që dhuruan ndaj Real-it, por për të gjithë sezonin. Rezultati ishte i drejtë dhe jam i lumtur”, shtoi trajneri katalanas.

Xavi më tutje shtoi se sukseset e ekipit të tij po vijnë nga puna që ata po bëjnë, derisa shtoi se përveç sulmit edhe repartet e tjera po funksionojnë mirë. Ai shtoi gjithashtu se kampionati është ende i gjatë dhe i duhet punë për të bërë.

“Të gjithë vrapojnë, punojnë dhe kjo në fund sjell rezultate. Ne kemi fituar shumë pikë dhe kjo do të thotë se ekipi po punon shumë mirë”, shtoi trajneri i Barcelonës.

“Mendoj se në këtë takim treguam jo vetëm se jemi shumë të fortë në sulm, por se jemi shumë solidë edhe në mbrojtje. Tani duhet të shohim përpara, na presin sfida të tjera, kampionati është ende i gjatë”, tha mes tjerash Xavi.

Në fund, Xavi u pyet edhe për anulimin e golit të Real-it nga sistemi VAR në minutën e 83-të nga Marco Asensio.

Trajneri i Real-it, Carlo Ancelotti, ka thënë në intervistë se është i dyshimtë nëse ishte vendim i drejtë i gjyqtarëve, por Xavi tha se “Më befasoi deklarata e Ancelotti-it, ishte pozicion i qartë jashtë loje”.

Barça tani është në hapa të sigurt drejt titullit kampion që i mungon që tre vite, pasi që kanë grumbulluar 68 pikë, duke e lënë prapa Real-in me 56 pikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore