Walker: Vuçiçi duhej të gjykohej për krime lufte e jo ish-krerët e UÇK-së

Ish-Shefi i Misionit Verifikues të Organizatës për Siguri dhe Bashkëpunim në Evropë (OSBE), William Walker, në një prononcim për televizionin “Tëvë1″, ka thënë se për krime luftë në Hagë të Holandës do duhej të gjykohej presidenti i Serbisë, Aleksandër Vuçiç, por asnjëherë ish-krerët e Ushtrisë Çlirimtare të Kosovës (UÇK).

Walker, i cili ka parë nga afër masakrat e policisë dhe ushtrisë serbe në Kosovë, ka kujtuar se Vuçiçi ka pasur rol të rëndësishëm në kabinetin e ish-udhëheqësit fashist të Serbisë, Slobodan Millosheviç, derisa ushtronte detyrën e ministrit të propagandës gjatë viteve 1990 të shekullit të kaluar.

“Po të kishim një situatë normale, sot në bankën e të akuzuarve në Hagë do duhej të ishte Aleksandër Vuçiçi, ish-ministri i propagandës në kohën e Millosheviçit dhe jo Hashim Thaçi, Rexhep Selimi, Jakup Krasniqi e Kadri Veseli”, ka theksuar diplomati amerikan në pension.

“Të gjithë e dimë se çfarë roli ka pasur Vuçiçi gjatë viteve të 90-ta dhe sot imagjinoni – ai është President i Serbisë dhe për më tepër respektohet nga partnerët ndërkombëtar. Këtu e keni vetëm një shembull se sa shumë ka ndryshuar komuniteti ndërkombëtar në raport me Kosovën”.

Ish-presidenti Thaçi ndodhet në qendrën e paraburgimit në Hagë që nga nëntori i vitit 2020, ngase ai bashkë me shokët e luftës – Kadri Veseli, Jakup Krasniqi e Rexhep Selimi – akuzohet për krime të pretenduara lufte dhe krime kundër njerëzimit. Gjyqi ndaj tyre ka nisur në prill të këtij viti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.