Vula e PD i kaloi Berishës, Ambasada e SHBA-ve: Pozicioni ynë me non grata-t mbetet i pa ndryshuar

“Pozicioni ynë në lidhje me individët e shpallur non-grata mbetet i pandryshuar”.

Kështu është shprehur Ambasada e SHBA-ve në Tiranë në një përgjigje për mediat, pasi tre ditë më parë Gjykata e Apelit i dha vulën e Partisë Demokratike, ish-kryeministrit Sali Berisha.

“Ne nuk angazhohemi me persona të shpallur sipas autoritetit të sanksioneve të SHBA dhe të gjithë duhet të shqyrtojnë me kujdes se si punojnë me individë të shpallur nga SHBA”.

Kujtojmë që më 19 maj, sekretari amerikan i Shtetit, Antony Blinken, e cilësoi ish-kryeministrin dhe ish-presidentin shqiptar, Sali Berisha, si persona non-grata në SHBA. Gjithashtu, familja e Berishës është cilësuar si non grata nga Sekretari Blinken.

Gjithashtu theksohet se angazhimet me aktorët politikë “do të mbështeten fort tek përkushtimi që ndajmë ndaj së ardhmes euro-atlantike të Shqipërisë, përfshi sundimin e ligjit dhe luftën kundër korrupsionit”.

“Siç ka vërejtur Presidenti Biden në mënyrë të përsëritur, lufta kundër korrupsionit është një çështje e sigurisë kombëtare për Shtetet e Bashkuara”.

Gjykata e Apelit vendosi të martën e  të 11 qershorit që vula e Partisë Demokratike t’i kalojë ish-kryeministrit Sali Berisha.

Pas më shumë se 2 orë seancë gjyqësore ku u dëgjuan përfaqësuesit ligjorë të Partisë Demokratike zyrtare të Lulzim Bashës dhe të grupit demokrat të Rithemelimit të Sali Berishës, trupi gjykues së Apelit u tërhoq për vendim.

Vula e PD-së i kalon Sali Berishës, vendos Gjykata

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.