Vuçiçi e cilëson “truk të radhës e përpjekje joserioze” zotimin e Kurtit për Asociacionin

Presidenti i Serbisë, Aleksandar Vuçiç, duke folur në samitin e liderëve të Ballkanit Perëndimor dhe Bashkimit Evropian (BE), deklaroi të enjten se synimi i Qeverisë së Kosovës që ta hartojë një draftstatut për Asociacionin e Komunave me Shumicë Serbe është “mashtrim i radhës dhe përpjekje joserioze” që vjen në kontekstin e anëtarësimit në Këshill të Evropës.

Ai e cilësoi “truk të radhës dhe përpjekje joserioze” zotimin e autoriteteve kosovare se deri në fund të majit do ta hartojnë një draftstatut për Asociacionin e Komunave me Shumicë Serbe dhe të njëjtin ta dërgojnë në Gjykatën Kushtetuese, duke pretenduar se ky hap është në kundërshtim me marrëveshjet paraprake të dialogut ndërmjet Kosovës dhe Serbisë.

“Kush jeni ju ta dorëzoni këtë tekst [draft-statut]? Marrëveshja e Brukselit është mjaft e qartë, ai duhet të bëhet me pajtimin e Serbisë, apo nëse ne pajtohemi, siç jemi pajtuar kontekstualisht, konceptualisht dhe në parim se duhet të jetë një dokument i dorëzuar nga BE-ja”, deklaroi presidenti serb, transmetoi Radio Televizioni i Serbisë (RTS) të enjten pasdite.

Dy vendet kanë arritur dy marrëveshje për Asociacionin e Komunave me Shumicë Serbe në dialogun për normalizimin e marrëvdhënieve nën kujdesin e BE-së, ndërsa deri tani janë paraqitur disa draftstatute për Asociacionin e Komunave me Shumicë Serbe, përfshirë një të BE-së vitin e kaluar, por edhe nga organizata gjermane Friedrich-Ebert-Stiftung (FES).

Ministrja e Punëve të Jashtme, Donika Gërvalla-Schwarz, në një letër drejtuar presidentit të Asamblesë Parlamentare të Këshillit të Evropës, Theodoros Rousopoulos, deklaroi se Qeveria e Kosovës është duke përgatitur një draftstatut për Asociacionin e Komunave me Shumicë Serbe të cilin është zotuar ta dërgojë në Gjykatën Kushtetuese deri në fund të majit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.