Vuçiç pret Scholz-in: Na pret një ditë e rëndësishme pune

Presidenti i Serbisë, Aleksandër Vuçiç, ka pritur në shtetin që ai udhëheqë Kancelarin e Gjermanisë, Olaf Scholz, i cili do të qëndrojë të premten në Beograd për vizitë zyrtare.

Përmes një postimi në Facebook, Vuçiç ka theksuar se “na pret një ditë e rëndësishme pune, një ditë që do të ndikojë shumë në shumë aspekte të së ardhmes së vendit tonë dhe që do t’i japë një vrull të fortë forcimit të marrëdhënieve ndërmjet Serbisë dhe Gjermanisë”.

Me kancelarin Scholz, Vuçiç theksoi se do të diskutoi “për çështje të tjera me rëndësi të madhe për Serbinë, i bindur se ajo që po bëjmë sot vendos një themel të fortë për të ardhmen jo vetëm të marrëdhënieve tona dypalëshe, por edhe forcimin e bashkëpunimit dhe lidhjeve në rajon”.

Para dy dite, Vuçiç, ka thënë se me Scholz-in – ndër të tjera – do të bisedojë edhe për Kosovën.

“Do të flasim për rrugën evropiane të Serbisë, për të gjitha marrëdhëniet tona politike, pra ka të bëjë me Kosovën dhe situatën në rajon, por edhe me zhvillimin e ekonomisë sonë përmes agjendës së rritjes dhe planit të reformave dhe anëtarësimit në tregun e përbashkët evropian”, u tha Vuçiç gazetarëve në Londër, transmeton media serbe “Nova”.

Me Scholz-in, Vuçiç ka njoftuar se do të flas edhe për lëndët e para minerale, përkatësisht litiumin serb, derisa ka bërë me dije se bashkë me kancelarin gjerman do të jetë edhe pronari i një prej kompanive me të mëdha në botë për prodhimin e veturave.

“Por në të njëjtën kohë do të flasim për atë që është tema e ditës. Atë ditë do të vijë nënkryetari i Komisionit Evropian, Maro Shevçoviç, përfaqësues të BERZH-it, Bankës Gjermane KFV, Bankës Italiane për Zhvillim, dhe kreut të kompanisë Mercedes Benz”, shtoi.

Kreu serb bëri me dije se do të vijojë nënshkrimi i Memorandumit të Mirëkuptimit për lëndët e para minerale, të cilin Ministria e Minierave dhe Energjetikës së Serbisë do ta nënshkruajë me Bashkimin Evropian.

“Ajo që është e rëndësishme për ne është që të gjitha këto institucione që kam përmendur, së bashku me përfaqësuesit e qeverisë sonë, të nënshkruajnë një dëshirë të përbashkët për një zinxhir të përgjithshëm vlerash që duhet të formohet në Serbi nga litiumi, bateritë e litiumit deri te makinat elektrike”, potencoi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.