![](https://albanianpost.com/wp-content/uploads/2024/07/vui.jpg)
Presidenti i Serbisë, Aleksandër Vuçiç, është takuar me Presidentin e Francës, Emmanuel Macron, me të cilin ka thënë se ka pasur një bisedë të gjatë për Kosovën.
Takimi është mbajtur në margjinat e Samitit të Komunitetit Politik Evropian në Londër.
Me homologun francez, ai ka theksuar se ka diskutuar për të gjitha çështjet, nga gjeopolitika e deri te e ardhmja evropiane e Serbisë dhe marrëdhëniet ekonomike dhe dypalëshe midis Serbisë dhe Francës, si dhe për Kosovën.
“Ne presim Macron në Beograd në fund të gushtit, më së voni në fillim të shtatorit. Do të jetë një vizitë e madhe dhe e rëndësishme për ne”, paralajmëroi Vuçiç, transmeton media serbe me seli në Kosovë “KosovoOnline”.
Kur është fjala për vetë Samitin, Vuçiç potencon se i ka thënë edhe Macron-it se ata që nuk janë në BE nuk kishin mundësi t’i drejtoheshin vetes.
“Ideja ishte që ne që nuk jemi në BE të vinim dhe të thoshim atë që mendojmë, kishim vetëm një panel për këtë dhe gjithçka dukej si NATO plus një samit – një takim ku të gjithë thonë ‘Ukraina duhet të fitojë’. Është mirë, por ka vende të tjera, nuk patëm mundësi të flasim”, pohoi ai, duke shtuar se me Volodymyr Zelenskin e Ukrainës ka biseduar për çështje dypalëshe, si dhe për situatën gjeopolitike.
Ndryshe, të premten në Serbi, do të shkojë për vizitë zyrtare Kancelari i Gjermanisë, Olaf Scholz, ku do të takohet me Vuçiç.
Një nga temat që do të diskutohet në takimin dypalësh, siç ka njoftuar presidenti serb, do të jetë edhe Kosova.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com