Vuçiç: Në rast konflikti NATO-n e presim 24 orë, përndryshe reagojmë ne

Presidenti i Serbisë, Aleksandër Vuçiç, gjatë një interviste në TV Pink, është shprehur se “nëse ka pogrom [masakër një-etnike] ndaj serbëve si në vitin 2004”, atëherë do të priste vetëm 24 orë për intervenim nga NATO, dhe nëse s’ka reagim, Serbia do të futet në Kosovë.

“Serbia ka ngritur vetëm gatishmërinë ushtarake, jo ushtrinë dhe policinë. Serbia nuk është futur në territorin e Kosovës për shkak të Marrëveshjes së Kumanovës”, tha Vuçiç.

Ndërsa presidenti serb, i cili kohëve të fundit në fjalorin e tij e ka futur këtë ”pogrom ndaj serbëve”, ka thënë se tash për tash “ne jemi duke vështruar me kujdes, ky pogrom ende s’ka nisur”, por se në rast konflikti “NATO-n e presim 24 orë që të reagojë, përndryshe reagojmë ne”.

“Jam i sigurt se njerëzit në NATO më kuptuan mirë dhe se do të bëjnë gjithçka për të ruajtur popullsinë serbe në Kosovë”, u shpreh Vuçiç.

Duke reaguar ndaj vendimit kundër Ivan Todosijevic, anëtarit të Listës Serbe në Parlamentin e Kosovës, i cili u dënua me dy vjet burg për deklaratën e tij në lidhje me me masakrën e Reçakut në Mars 2019, Vuçiç tha se ai “mendon njësoj për Reçakun si Todosijeviçi”.

“Unë mendoj njësoj për Reçakun, e them këtë publikisht, vetëm unë nuk mund të bëj asgjë,” tha presidenti i Serbisë.

Ai shtoi se njësitë e Ushtrisë Serbe në jug të vendit, pas vizitës së sotme të ambasadorit rus Alexander Bocan-Kharchenko, do të vizitohen nga të dërguarit ushtarakë të “QUINT-it”, Shtetet e Bashkuara, Italia, Gjermania, Mbretëria e Bashkuar dhe Franca.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.