Të mërkurën, në deklarimin e tij për mediat serbe në New York, Presidenti i Serbisë, Aleksandër Vuçiç, indirekt pranoi propozimin franko-gjerman, por e kushtëzoi atë me koncesione lidhur me të drejtat e serbëve në Kosovë.
Duke iu referuar dokumentit të publikuar nga Albanian Post, Vuçiç-i thotë: A e di përmbajtjen e tij, po e di. Por Serbia nuk do të lejojë anëtarësimin e Kosovës në OKB, derisa unë të jem President. Ndoshta qeveria mund të vendosë ndryshe, por nuk do ta kenë nënshkrimin tim. A duam zgjidhje kompromisi dhe marrëdhënie të mia (referenca te plani franko-gjerman), natyrisht që duam. Por, së pari duhet të shohim të drejtat e serbëve dhe çfarë fitojmë ne nga kjo punë.
Sipas burimeve diplomatike të Albanian Post, Presidenti Vuçiç ka dhënë sinjale të qarta që është i interesuar për propozimin franko-gjerman.
Por, sipas, po të njëjtave burime, kjo nuk është e mjaftueshme për ndërmjetësuesit.
BE-ja dhe SHBA janë të lodhura nga paqartësia kronike e Beogradit dhe mungesa e vullnetit për t’u përcaktuar për një model specifik.
Siç i thonë burimet AP-së, BE-ja dhe SHBA synojnë t’i japin fund politikës së prolongimit të procesit të dialogut, që deri tani e karakterizonte taktikën e palës serbe.
SHBA dhe BE së pari duan një “PO” të fortë, të qartë dhe të pakthyeshme nga Serbia.
Vetëm pasi që të marrin zotimin e Presidentit Vucic, ndërmjetësit do të aterojnë, me tërë fuqinë e tyre diplomatike, në Prishtinë, për të kopsitur detajet e mbetura me palën kosovare.
Për publikimin e Albanian Post është pyetur edhe kryeministri i Kosovës, Albin Kurti.
Duke e komentuar pa e mohuar, Kurti deklaroi se meqë është një dokument pa autorë, s’do ishte e shëndetshme të jap thotë çfarë mendon për të
“Qarkullojnë dokumente të ndryshme mirëpo unë besoj që nuk është as e dobishme as e drejtë që unë t’i komentojë ato dokumente që nuk kanë autorë”, deklaroi Kurti.
Por, kryeministri ishte i gatshëm të komentojë qëllimin që kanë këto lloj propozimesh.
“Bëhen për të matur pulsin e qytetarëve dhe të politikanëve”, tha ai.
Për “kornizën e re” ka folur edhe i dërguari i Gjermanisë për Ballkanin Perëndimor, Manuel Sarrazin.
Ai ka pasur një kërkesë të qartë për shoqërinë civile e gjithë kosovarët në përgjithësi, që të mos i mbysin edhe propozimet e mira, sa herë shfaqen ato në publik.
Të dielën e 18 shtatorit, Albanian Post publikoi dokumentin katër faqesh i cili paraqiste planin në kornizën e re për marrëveshje në mes të Kosovës e Serbisë, i përpiluar pas angazhimit të këshilltarëve të presidentit Emmanuel Macron dhe kancelarit Olaf Scholz, të cilin e ka siguruar Albanian Post.
Aty thuhet se në vitin 2023 duhet të nënshkruhet marrëveshja e dytë për normalizim të marrëdhënieve, pas asaj të vitit 2013, me të cilën Serbia faktikisht e pranon realitetin e Kosovës shtet të pavarur, por nuk e njeh formalisht.
Në një fazë të mëvonshme, hipotetikisht pas 10 vitesh, atëherë kur BE-ja është e gatshme të zgjerohet dhe ta përfshijë Ballkanin perëndimor, arrihet marrëveshja për njohje të ndërsjellë, si parakusht i të dy shteteve për anëtarësim në BE.
Me marrëveshjen e vitit të ardhshëm (nëse pranohet propozimi) Kosovën e pranojnë edhe pesë shtetet që akoma nuk e kanë njohur të Bashkimit Evropian, kurse Serbia do të përfitojë një ndihmë masive financiare, asistencë ekonomike dhe do njihet si fuqia e rajonit.
“Korniza e re” të cilën e publikoi Albanian Post është propozimi i ri i ardhur direkt nga përfshirja e Macron e Scholz në procesin e dialogut, sepse siç thuhet në dokument “Kosova e Serbia në vete nuk do të mund ta zgjidhin kurrë problemin”.
Dokumenti shpjegon logjikën prapa kornizës së re, përmban vizionin 10 vjeçar të zgjidhjes së problemit dhe jep një “makro-perspektivë”.
Përbëhet nga hyrja dhe më pas është i ndarë në tri segmente bashkë me tre nën-titujt që përmbajnë 13 pika.
Të gjitha segmentet shpjegojnë të ashtuquajturën “kornizën e re”, e cila u është prezantuar Albin Kurtit e Aleksandër Vuçiç-it. Këtë kornizë, publikisht, e ka pranuar vetëm Presidenti serb Vuçiç pas vizitës së dy këshilltarëve në Beograd.
Propozimi në fund parasheh edhe si të vazhdohet tutje nëse Kosova dhe Serbia nuk pranojnë këtë propozim.
/Albanianpost.com
