Vuçiç kërcënon Kurtin: Nuk lejojmë persekutim, masat tona do të jenë të dhimbshme

Aleksandër Vuçiç ka mbajtur konferencë të jashtëzakonshme për media pas ndërhyrjes së forcave speciale të Kosovës në Jarinje dhe Bërnjak për të zbatuar reciprocitetin e targave, duke deklaruar se masat që tash do t’i ndërmerr Serbia do të jenë të dhimbshme për palën tjetër – Kosovën. Serbia do të përgjigjet me masa të saj”, të cilat do t’i shkaktojnë “dhimbje palës tjetër”.

“Nesër do të flasim për masat tona, do të jenë të dhimbshme, sidomos në planin ekonomik. Shpresoj të mos jetë e nevojshme të marrim këto masa”, ka thënë Vuçiç.

“Sot është një ditë shumë e rëndë dhe e vështirë për popullin serb”, pohoi presidenti serb.

“Kur keni të bëni me njerëz që nuk janë përgjegjës, dhe qëllimi i vetëm i të cilëve është si të zgjerojnë pushtetin, e jo të bëjnë diçka të mirë për qytetarët, është e vështirë të dalësh me zgjidhje racionale”.

“Mbrëmjen e kaluar ne e dinim që Prishtina po planifikon një lëvizje të forcave të veçanta në veri dhe kjo është hera e gjashtë e pushtimit më brutal nga automjetet e armatosura, tubat e gjatë, snajperistët”, ka thënë Vuçiç.

Pos tjerash, në konferencën për media, Presidenti i Serbisë, Aleksandër Vuçiç, u ka thënë serbëve në Kosovë që të mos bien pre e “provokimeve të Prishtinës”.

“Njerëzit tanë e dinë se ku janë foletë e tyre të snajperit, çfarë lloj armësh kanë, kur i vendosin në veri 24 orë dhe 48 orë më parë”.

“Njerëzit tanë dinë gjithçka, siç e dimë ne, unë thjesht i kërkoj popullit tonë të mos bjerë pre e provokime”, thotë ai.

Vuçiç ka komentuar edhe qëndrimin e bashkësisë ndërkombëtare, ndërsa ka thënë se “është lodhur nga historia e të dyja palëve”.

“Jam ngopur me historinë në lidhje me thirrjet e të dyja palëve që të përmbahen nga provokimet, dhe çfarë bëri Serbia dhe si e provokoi Kosovën”, thotë Vuçiç.

I pyetur rreth aksionit të njësisë speciale të Policisë së Kosovës në Jarinje, Vuçiç, ka thënë se një “rrezik” të tillë e kishte paraparë edhe më herët dhe “këtë brengë” ia kishte thënë edhe përfaqësuesit special të BE-së për dialogun Kosovë-Serbi, Mirsloav Lajçak.

“Kam biseduar me Lajçak dhe e kam njoftuar për rreziqe të ndryshme, por askush nuk më dëgjon sepse kur diçka nuk i prek personalisht njerëzit, ata i kushtojnë më pak vëmendje”, ka thënë Vuçiç.

Sipas, Vuçiç – “Kosova zbaton vetëm atë që i përshtatet”.

“Dikush në Evropë më në fund duhet të na thotë nëse ekziston ‘Marrëveshja e Brukselit’ apo jo, dhe jo të na tregojë se Kosova zbaton vetëm atë që i përshtatet. Ne duhet ta marrim atë përgjigje shpejt, sepse durimi ynë nuk është i pakufishëm”, tha Vuçiç.

Aleksandër Vuçiq ka folur edhe në emër të serbëve në përgjithësi.

“Çdo person i zakonshëm në vend është i shqetësuar për situatën e krijuar në Kosovë”, ka thënë ai.

Mes tjerash, Vuçiç, ka thënë se shpreson që Kosova “nuk do të provokojë”, Serbinë me masa të tjera, posaçërisht ato ekonomike.

“Shpresoj se nuk do të ketë masë ekonomike, por nuk lejoj poshtërim të mëtejshëm të Serbisë edhe pse unë jam pro për një rajon të hapur dhe mbroj me çdo kusht idenë e lidhjes ekonomike”, ka përfunduar Vuçiç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.