Vuçiç: Dje u përpoqën ta zgjidhin çështjen e anëtarësimit të Kosovës në KiE, falë dy shteteve u ndalua
![](https://albanianpost.com/wp-content/uploads/2023/12/licensed-image.jpeg)
Presidenti i Serbisë, Aleksandër Vuçiç, ka thënë se u “bënë përpjekje të premten për të zgjidhur gjithçka” për anëtarësimin e Kosovës në Këshillin e Evropës, para takimit të Asamblesë Parlamentare.
Mirëpo, sipas Vuçiç-it, një gjë e tillë “është parandaluar falë ndërhyrjes së dy vendeve”.
“Ata u përpoqën dje para vendimit të Asamblesë Parlamentare të Këshillit të Evropës për të përfunduar gjithçka, dhe falë ndërhyrjes së dy vendeve, kjo nuk ndodhi”, u tha Vuçiç gazetarëve më 6 prill në selinë e Partisë Progresive Serbe, transmeton “Radio Evropa e Lirë” në gjuhën serbe.
Kreu serb nuk specifikoi ndonjë përpjekje ose cilat vende ishin të përfshira.
Ai shtoi se më 7 prill do të udhëtojë për në Paris, ku do të ketë takime të rëndësishme dhe një takim me presidentin francez Emmanuel Macron.
“Ne po përballemi me ditë të vështira sa i përket vendimeve që kanë të bëjnë me anëtarësimin e Kosovës në Këshillin e Evropës, në Kombet e Bashkuara, presion të ashpër nga rajoni, Evropa dhe bota për këtë çështje, por vendi duhet të zhvillohet”, deklaroi Vuçiç.
Asambleja Parlamentare e Këshillit të Evropës do të votojë për pranimin e Kosovës më 16 prill, ndërsa vendimi përfundimtar pritet në mbledhjen e Komitetit të Ministrave më 16 maj.
Ndryshe, më 5 prill, me urdhër të Vuçiç-it, Serbia formoi një Grup Punues për koordinimin e aktiviteteve të autoriteteve shtetërore që punonin në planin e “parandalimit të pranimit të Kosovës në Këshillin e Evropës”.
Më 4 prill, Vuçiç i bëri thirrje Qeverisë që t’u dërgojë të gjithëve një non-paper në të cilin do të prezantohet qëndrimi i Serbisë për këtë çështje.
“Shanset tona janë minimale,” tha ai, duke shtuar se kjo nuk do të thotë se ata nuk duhet të luftojnë.
Kosova aplikoi për anëtarësim në atë organizatë ndërkombëtare në maj të vitit 2022 dhe bëri një hap përpara drejt anëtarësimit kur më 27 mars Komisioni për Politikë dhe Demokraci i Këshillit të Evropës miratoi raportin e raportueses për Kosovën, Dora Bakoyanis.
Këshilli i Evropës, si organizata lider në Evropë në fushën e të drejtave të njeriut, ka 46 shtete anëtare.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com