Disa javë pas arratisjes spektakolare – të nëntën me radhë – nga burgu i Smrekonicës të Vushtrrisë, Faton Hajrizi, tani është bërë personi më i përfolur në rajon.
Në orët e para të së enjtes (00:55), në Lozincë të Serbisë – kufiri mes Serbisë dhe Bosnje e Hercegovinës – Hajrizi dyshohet se ka vrarë një polic serb dhe ka plagosur një tjetër.
Vrasja ka ndodhur kur zyrtarët policorë serbë kanë qenë duke kontrolluar veturat në një pikë kontrolli në Lipniçki Shor, pasi e kanë ndaluar një veturë të tipit Mercedes, ku dyshohet se ka qenë Hajrizi.
Siç raportohet për ngjarjen, njëri prej personave, që dyshohet të jetë Hajrizi, ka shtënë me armë duke e goditur zyrtarin policor Nikolla Kërsmanoviç në gjoks dhe zyrtarin policor Iliç Vjekosllav në shpatull dhe më pas ka ikur.
Më pas, të dy zyrtarët policorë janë transportuar në Spitalin e Lozninës, derisa Kërsmanoviç ka vdekur si pasojë e plagëve të marra.
Pas kësaj ngjarje, forca të shumta policie u panë nëpër rrugët e Loznicës dhe në një perimetër më të gjerë në kërkim të të dyshuarit për vrasjen e policit serb – i cili vazhdon të jetë në arrati.
Po ashtu, janë vendosur postblloqe nëpër rrugë të ndryshme që të bëhet i mundur lokalizimi i të dyshuarit.
Fillimisht, u raportua se në vendin e ngjarjes janë gjetur dokumentet identifikuese të Artan Hajrizit, por i njëjti tregoi vetë se nuk ka të bëjë me ngjarjen dhe se gjendet në Gjermani, derisa tha se i vëllai Fatoni ia ka vjedhur dokumentet.
“Jam në policinë e Gjermanisë në Hanover, i kam lajmëruar që m’i kanë vjedhur dokumentet, dokumentet m’i ka marrë se kuletën e la në tavolinë në korridor me çelësa, sepse vëllai ka qëndruar te unë”, tha Hajrizi për mediat në Prishtinë.
Ndërsa, në mesditën e së enjtes, Ministri i Punëve të Brendshme të Serbisë, Ivica Daçiç, njoftoi për arrestimin në Bijelinë të Republikës Srpska – etniteti serb në Bosnje e Hercegovinë – të dyshuarit që ka ndihmuar të arratisej të dyshuarin për vrasjen e policit serb.
Daçiç bëri me dije se bashkë me të është arrestuar edhe gruaja e tij me inicialet I.R, në cilësinë e bashkëpunëtores.
“Në Bijelinë, pasdite, në bashkëpunim me Policinë e Republikës Srpska, është arrestuar Z.R (1985), i cili dyshohet se ka organizuar transportin e vrasësit nga Presheva për në Loznicë. Gjithashtu, gruaja e tij IR është arrestuar si bashkëpunëtore në Mlladenoc”, tha kreu i MPB-së serbe.
Cili është rrëfimi i policit të plagosur?
Ndihmësdrejtori i Policisë së Serbisë, Dragan Vasiljeviç, ka treguar se ka vizituar policin e plagosur serb Vjekoslav Iliç, duke bërë me dije se ai është mirë dhe ndihet mirë, derisa ka transmetuar edhe rrëfimin e tij për ngjarjen në Loznicë, ku një shqiptar i Kosovës vrau një polic serb dhe plagosi një tjetër.
“Ata panë një ‘Mercedes’ me targa turke. Për ta ka qenë e dyshimtë, kanë ndjekur mjetin, kanë ndezur dritat. Makina ndaloi një kilometër e gjysmë më tutje. Policët kanë dalë nga vetura dhe kanë kërkuar dokumente personale, ka qenë kontroll rutinë”, tha Vasiljeviç.
Ai tregon se nuk ka pasur të shtëna menjëherë, ndërsa shoferi dhe pasagjeri kanë siguruar dokumentet e tyre personale. “Duke respektuar rregullat, policia ka kërkuar që të zbresë një person – pasagjeri, ndërsa personi tjetër ka mbetur në automjet”, shtoi.
“Udhëtari doli, fytyra dukej normalisht në gjestikulacion, ishte i buzëqeshur, polici Iliç ishte në anën e majtë, në zonën e shoferit për ta mbajtur nën kontroll. Menjëherë pas fillimit të kontrollit të fytyrës (në dokument) janë dëgjuar të shtëna, ka qenë në pjesën e pasme të veturës”, ka vazhduar Vasiljeviç.
Ai thekson se sulmuesi ka qëlluar disa herë në drejtim të policit Iliç dhe e ka goditur në shpatullën e djathtë, transmeton media serbe “Nova”.
“Siç thotë ai (Iliç), ishte shumë e vështirë, por ai arriti ta merrte armën dhe qëlloi disa herë në drejtim të atij personi”, pohoi.
Ai potencoi se nuk ka informacione nëse sulmuesi është plagosur. Iliç, gjithashtu ka thënë se se sulmuesi nuk dinte ose nuk donte të fliste gjuhën serbe.
Po i vëllait të tij, Artanit?
Artan Hajrizi, i vëllai i Fatonit, i cili dyshohet se vrau një polic dhe plagosi një tjetër në Loznicë të Serbisë, ka treguar bisedën që ka pasur me të në kohën kur ai si arratisur kishte qëndruar tek ai në Gjermani.
Sipas rrëfimit të tij në një intervistë për televizionin 7, ai ka treguar se e ka kërcënuar Fatonin që të largohej nga banesa e tij, ose në të kundërtën do ta thërriste policinë.
“Unë kam biseduar me të, i kam treguar që më e mira është për ty: ktheu poshtë, kthehu poshtë e dorëzoju shtetit se nuk janë këto ma gjëra sikur para 20 vjetëve”, tha fillimisht ai.
“I kam thënë: dorëzoju shtetit më mirë. Ai më ka thënë ‘ato janë probleme të mia’, thash kqyre vëlla ‘ti dil prej qetushit, jo jo unë t’i thirri policinë vet qetu se nuk du me pas probleme”, shtoi.
“E kam edhe deklaratën në polici, që e kanë shkruar gjermanët që unë kam dashur ta lajmëroj në polici, dhe i kom than se nuk të vinë ty policia e thjesht, po të vijnë policia që janë më të specializuar të Gjermanisë, edhe aty i kam thanë po dal deri qitu – se unë dola prej dere – që s’del unë kam me thirr policinë”, vazhdoi rrëfimin e tij.
Ai pretendon se Fatoni ia ka vjedhur dokumentet identifikuese atij, pasi që, siç potencoi vet, ato i le gjithmonë mbi tavolinë pasi që të kthehet nga puna.
Faton Hajrizi që disa javë është arratisur nga burgu i Smrekonicës të Vushtrrisë. Gjatë kësaj kohe në arrati, i vëllai ka thënë se ai ka qëndruar në Spanjë, Austri, Itali e Slloveni.
Reagimet nga autoritetet e Kosovës
Kryeministri i Kosovës, Albin Kurti, ka thënë se nuk ka për të shtuar asgjë përveç asaj që është publike për vrasjen e një polici serb në Serbi e plagosjen e një tjetri.
“Nuk kam diçka shtesë, mirëpo organet e sigurisë po i grumbullojnë informacionet dhe ju kisha lutur që të përcillni me vëmendje komunikatat e Policisë, Ministrisë së Brendshme dhe Ministrisë së Jashtme”, tha Kurti gjatë një konference për media.
“Edhe unë pres që të japin deklaratat e tyre profesionale, sepse ne besojmë se kjo çështje nuk duhet të politizohet, por të trajtohet si e tillë, nga pikëpamja e sigurisë, ligjore dhe profesionale”, shtoi.
Ndërsa, Ministria e Punëve të Jashtme dhe Diasporës (MPJD), ka apeluar tek mërgimtarët që t’i shmangin lëvizjet përmes Serbisë.
“Ministria e Punëve të Jashtme dhe Diasporës përmes Zyrës Ndërlidhëse në Beograd po ndjek nga afër zhvillimet në lidhje me pretendimet e Ministrit të Brendshëm të Serbisë, Ivica Daçiç për një incident në magjistralen afër Loznicës në Serbi, ku pretendon që ka mbetur i vrarë një polic serb dhe i përfshirë në këtë rast sipas tij është një shtetas i Republikës së Kosovës”, thuhej në komunikatë për media.
Serbia e politizon vrasjen
Serbia nuk ka hezituar, përkundër se pa asnjë provë, që ta fajësojë Kosovën për këtë ngjarje.
Ishte kreu i MPB-së serbe Daçiç i cili theksoi se ka dyshime se rasti ka qenë i planifikuar nga strukturat e Kosovës.
“Ky nuk mund të jetë aksident dhe me të do të merret Prokuroria për krim të organizuar, sepse policët janë sulmuar në krye të detyrës”. Është kontaktuar edhe policia gjermane. Vëllai i tij është arratisur nga burgu në korrik. Ai vrau një ushtar rus. Mendoj se nuk mund të jetë rastësisht, që akti të jetë i organizuar”, tha ai.
Akuzën, korrieri më i madh i propagandës serbe e ka përsëritur edhe më vonë.
“Pasoja e atij akti dhe organizimi terrorist është vrasja e një polici dhe për këtë kërkojmë dhe presim bashkëpunim të plotë me policinë gjermane dhe me EULEX-in dhe jo gënjeshtra që askush nuk i beson”, potencoi Daçiç.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
