Von Cramon: Vuçiç duhet ta përfundojë dialogun me Kosovën, të mos i shërbejë Kinës dhe Rusisë

Raportuesja për Kosovën në Parlamentin Evropian, Viola von Cramon, në një intervistë për rrjetin ballkanik të lajmeve “N1” është shprehur se presidenti i Serbisë, Aleksandër Vuçiç, “e di shumë mirë që në një moment duhet ta përfundojë dialogun me Kosovën”.

“Ai jo vetëm që flet, por edhe punon. Shpresoj që ai të tregojë në praktikë atë që tha. Ai nuk e nënshkroi marrëveshjen (Marrëveshjen Bazë me 27 shkurt, dhe planin zbatues me 18 mars në Ohër të Maqedonisë së Veriut), por premtoi se do ta zbatonte. Ne duam që Serbia të jetë më serioze dhe tani duhet të ndërmerren hapa të rinj për të finalizuar marrëveshjen”, ka thënë Cramon.

Në rast se ndodh e kundërta, deputetja gjermane paralajmëron pasoja për Vuçiç-in, duke thënë se Bashkimi Evropian do të vepronte siç ka vepruar me të tjerë kur kanë ndjekur politika destabilizuese dhe në kundërshtim me vlerat e BE-së.

“BE-ja lehtë dhe shpejt mund t’i ndërpresë fondet dhe të ndalojë pagesat, siç i është bërë Millorad Dodik-ut (Presidenti i Republikës Srpska – entiteti serb në Bosnje e Herecegovinë) dhe të tjerëve, por nuk duam që kjo të ndodhë, vetëm presin që Serbia të përmbushë atë që ka nënshkruar dhe të cilës i detyrohet”, shtoi ajo.

E pyetur se nëse BE-ja është në dijeni të faktit që shumë njerëz në Serbi mendojnë që BE-ja është mbështetëse e regjimit në Beograd, regjim ky që u kritikua ashpër në raportin e fundit të miratuar në PE, ajo thotë se “ka pasur shumë lobim në të kaluarën, për të zbutur Raportin, por kjo nuk ndodhi”.

“Shpresoj që një opinion i tillë të ndryshojë me këtë Raport, i cili në disa pjesë është më kritik, më i qartë dhe më i rreptë. Mendoj gjithashtu se kritikat tona në raport janë të ngjashme me kërkesat që u dëgjuan nga protestat nga njerëzit që kërkojnë ndryshim. Parlamenti Evropian e kuptoi se Serbia duhet të shprehë qartë qëndrimin e saj, nëse ka interes real për bashkëpunim apo ndoshta Serbia është e interesuar të lidhet me Rusinë dhe Kinën, dhe jo me BE-në”.

“Serbia përfiton shumë nga ne, duke filluar nga paratë, fondet, investimet e huaja direkte, jo vetëm nga Unioni, por edhe nga Gjermania përmes hapjes së vendeve të punës, gjë që e ndihmoi shumë Qeverinë e Serbisë”, thekson eurodeputetja.

Ndërkaq, Cramon nënvizoi se Serbia “nuk duhet të jetë vend ku do të fshihet propaganda ruse, nga ku Moska përhapë gënjeshtra kundër BE-së. Përgjegjësia për këtë i takon autoriteteve në Serbi”.

“Që kur filloi lufta në Ukrainë, çdo vend duhej të bënte një zgjedhje. U desh derisa Presidenti i Serbisë vendosi ta votojë rezolutën në OKB. Tani presim që ajo të harmonizohet dhe të vendosë sanksione ndaj Rusisë”, pohon ajo.

Gjithashtu, deputetja gjermane thotë se “nuk mund ta lejojmë Serbinë të qëndrojë në anën e Rusisë apo autokratit kinez, i cili nuk e dimë nëse një ditë do të sulmojë Tajvanin”.

“Ne nuk duam ndikimin e Kinës nëpërmjet Serbisë në Ballkanin Perëndimor. Ne e kemi të qartë se duam që Serbia të kthehet drejt Perëndimit, por jo vetëm për financat, por edhe politikisht”, tha ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.