Vlerësohet me Dekoratën e lartë “Gjergj Kastrioti Skënderbeu” profesor Aurel Plasari

Presidenti i Republikës së Shqipërisë Ilir Meta, me anë të një ceremonie të posaçme, ka vlerësuar me Dekoratën e lartë “Gjergj Kastrioti Skënderbeu” profesor Aurel Plasarin.

Plasari njihet si historian, shkrimtar, përkthyes dhe studiues i shquar i albanologjisë.

Në fjalën e tij, Presidenti Meta tha se Plasari është një ndër kontribuuesit “e palodhur të kërkimit shkencor, që ka ndriçuar vlerat kombëtare me ndikim të veçantë në shoqërinë shqiptare”.

Veprimtaria e profesor Plasarit është shtrirë në gati pesë dekada dhe i ka ofruar kulturës shqiptare jo vetëm përkthime të shënuara, por edhe studime të një rëndësie të veçantë për rolin marrës dhe dhënës të shqiptarëve në qytetërimin evropian.

Për këtë veprimtari të gjerë e të suksesshme, profesor Plasari u vlerësua nga Presidenti Meta me dekoratën që mban emrin e heroit tonë kombëtar Gjergj Kastrioti Skënderbeu.

Veprat e Plasarit

Për vite të tëra, Plasari është marrë me studimet kushtuar Heroit tonë Kombëtar.

Si rrjedhojë e kësaj, profesor Plasari shkroi veprën e tij më të rëndësishme “Skënderbeu-një histori politike”.

Është vepra që në Vitin Mbarëkombëtar të Skënderbeut, 2018, u vlerësua me Çmimin Shkencor Ndërkombëtar të Akademisë së Shkencave të Shqipërisë, si studimi më i suksesshëm për Gjergj Kastriotin – Skënderbeun.

Plasari me këtë vepër e ka nxjerrë në një dritë të re portretin e Skënderbeut, jo vetëm si strateg ushtarak dhe diplomat i zoti, por edhe si një burrë shteti që e integroi Arbërinë e tij, në traktatet e para të Evropës politike.

Vepra e tij e fundit “Àrbni gjeografik, historik, kishtar dhe politik” është përqendruar përsëri në nxjerrjen në dritë të Mesjetës arbërore, shpesh gabimisht të përfytyruar si “e errët”, duke e rivënë atë në raporte reale jo vetëm me fqinjët, por edhe me Evropën e kohës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.