Vlerësimi i KE-së për Ballkanin Perëndimor drejt finalizimit, dorëzohet drafti i BeH-së

Bosnjë dhe Hercegovina ka dorëzuar zyrtarisht të martën e 17 shtatorit draftin e saj të agjendës së reformave, të cilat do të jenë parakusht për disbursimin e fondeve të Planit të Rritjes për vendet e Ballkanit Perëndimor.

Lajmi u bë i ditur nga Komisioni Evropian, duke cituar një zëdhënës të institucionit evropian.

“Komisioni (Evropian) aktualisht është duke finalizuar vlerësimin e tij mbi agjendat e reformave të partnerëve tanë të Ballkanit Perëndimor, duke mbuluar si reformat në fushën themelore ashtu edhe reformat socio-ekonomike, duke përfshirë ato të Bosnjës dhe Hercegovinës, draftin e të cilës e kemi marrë sot”, deklaroi zëdhënësi i KE-së për Albanian Post.

Nga ana tjetër, AP-ja mësoi më herët se Presidentja e Komisionit Evropian, Ursula von der Leyen do të presë në një drekë pune liderët e Ballkanit Perëndimor më 19 shtator për të vlerësuar marrëdhëniet dhe bashkëpunimin mes palëve në kontekstin e planit të rritjes.

Ekskluzive/ Komisioni Evropian synon të organizojë një takim me liderët e Ballkanit Perëndimor më 19 shtator

Zëdhënësi i KE-së shtoi se pasi të finalizohet vlerësimi, Komisioni do të konsultohet me shtetet anëtare për axhendat e reformës në Komitetin IPA.

Instrumenti për Asistencën e Para-Aderimit (IPA) është mjeti me të cilin BE-ja ka mbështetur reformat në rajonin e zgjerimit me asistencë financiare dhe teknike që nga viti 2007.

Më pas, në rast të një opinioni pozitiv të lëshuar nga Komisioni, KE-ja do të miratojë Agjendat e Reformës të paraqitura nga përfituesit, sqaroi më tej zyrtari evropian.

“Synimi është që të jemi në gjendje të disbursojmë parafinancimin sa më shpejt të jetë e mundur për të nisur reformat pasi të jenë finalizuar procedurat, duke përfshirë marrëveshjet përkatëse të lehtësirave dhe kredisë me secilin partner”, ravijëzoi në përmbyllje zëdhënësi i Komisionit Evropian.

Grupi i Punës për Zgjerimin dhe Vendet Negociuese për Anëtarësim në Bashkimin Evropian u mblodh gjithashtu më herët në Bruksel, për të diskutuar mbi fondet e “Planit të Rritjes” për vendet e Ballkanit Perëndimor.

Lajmi u konfirmua për AP-në nga zyrtarja në Zyrën e Shtypit të Këshillit të BE-së, Liis Jaansalu.

Kujtojmë që, Grupi i Punës është përgjegjës për procesin e zgjerimit dhe marrëdhëniet me vendet kandidate që negociojnë anëtarësimin e tyre në BE.

Kryesisht merret me: përgatitjen e negociatave të anëtarësimit dhe pozicionin negociator të BE-së, vlerësimin e progresit të bërë nga vendet kandidate në përmbushjen e kritereve të anëtarësimit, marrëdhëniet me vendet kandidate në kuadër të Marrëveshjes së Asociimit dhe instrumentin financiar për Asistencën e Para-Aderimit (IPA).

Detajet

Këstet e para të “Planit të Rritjes” pritet të disbursohen këtë vjeshtë, duke ofruar një mundësi të vlefshme për vendet e Ballkanit Perëndimor që të forcojnë ekonomitë e tyre dhe që të përmirësojnë përafrimin e tyre me politikat evropiane.

Në një direktivë të re historike, Komisioni Evropian u ka kërkuar vendeve që të justifikojnë, si pjesë e programeve të tyre të reformës, se si synojnë të harmonizojnë politikën e tyre të jashtme me atë të Bashkimit Evropian, duke përfshirë edhe sanksionet.

Njoftimi i bërë nga zëdhënësja Ana Pisonero, theksonte rëndësinë e shtrirjes politike në procesin e reformës, ndërsa theksoi zhvillimin gradual dhe të vazhdueshëm që pritet në këtë fushë.

“Përafrimi me politikën e jashtme të përbashkët të BE-së përfshihet si një objektiv specifik në programet e reformës. Me fjalë të tjera, vendet duhet të shpjegojnë se si reformat e tyre do të kontribuojnë në harmonizimin e qëndrueshëm me politikat e jashtme të Bashkimit Evropian”, nënvizonte zyrtarja.

Plani i Rritjes, më ambicioz i nisur ndonjëherë nga Bashkimi Evropian për këtë rajon, synon të dyfishojë ekonominë e Ballkanit Perëndimor gjatë dhjetë viteve të ardhshme.

I pajisur me gjashtë miliardë euro, duke përfshirë dy miliardë grante dhe katër miliardë kredi të buta, ky program ambicioz do të zgjasë nga viti 2024 deri në vitin 2027.

Çdo vend do të duhet të hartojë një program reformash, miratimi i të cilit do t’i nënshtrohet një vendimi zbatues nga Komisioni.

Ky plan ambicioz nuk siguron vetëm fonde: ai imponon një rishikim real të prioriteteve politike dhe ekonomike, duke e udhëhequr Ballkanin Perëndimor drejt një përafrimi më të ngushtë me Bashkimin Evropian.

Harmonizimi i politikave të jashtme është tashmë një imperativ, duke shënuar një hap vendimtar në përgatitjen e vendeve të rajonit për integrimin e tyre të ardhshëm në BE.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.