Vlera e investimeve të huaja në prona arrin në 1.7 miliardë euro në Shqipëri

Investimet e huaja në tregun e pasurive të paluajtshme në Shqipëri kanë kapur një vend me rëndësi në ekonominë e vendit, duke kryesuar edhe investimet e huaja në tremujorin e parë të vitit 2024.

Kështu kanë pasqyruar të dhënat e Bankës së Shqipërisë, të cilat reflektojnë se  investimet e të huajve në pasuri të paluajtshme në Shqipëri arritën vlerën e 84 milionë eurove, në rritje me 71% më shumë krahasuar me tremujorin e parë të vitit të kaluar.

Pasuritë e paluajtshme sollën pothuajse 24% të vlerës totale të investimeve të huaja direkte. Por, nëse përjashtojmë fitimet e riinvestuara (duke supozuar se investimet në pasuri të paluajtshme përbëjnë kryesisht flukse të reja hyrëse), ato përbëjnë 58% të vlerës së kapitaleve të reja të investuara në ekonominë.

Nga viti 2022, investimet në prona kanë dominuar strukturën e investimeve të huaja direkte në Shqipëri. Cikli i rritjes së shpejtë të çmimeve të pasurive të paluajtshme në Shqipëri në vitet pas pandemisë po mbështetet në masë të konsiderueshme prej kërkesës që vjen nga investitorët e jashtëm.

Sipas rezultateve të vrojtimit periodik të Bankës së Shqipërisë, rreth 26% të banesave të shitura në 6-mujorin e dytë 2023 u raportuan të blera nga shtetas jorezidentë. Nga këta, 1/3 janë shtetas të vendeve jashtë BE-së. Pesha e blerjeve nga jorezidentët u rrit ndjeshëm krahasuar me nivelin 14% të 6-mujorit të parë 2023.

Investimet e huaja në prona janë tipike sidomos për zonat bregdetare, ku, pavarësisht rritjes së çmimeve, ato ngelen mjaft konkurruese krahasuar edhe me vendet e tjera bregdetare të rajonit.

Banka e Shqipërisë vlerëson se në fund të tremujorit të parë të vitit, stoku i investimeve të huaja në tregun e pasurive të paluajtshme në Shqipëri arriti në 1.66 miliardë euro, në rritje me 41% krahasuar me një vit më parë. Në dekadën e fundit, stoku i investimeve të huaja në pasuri të paluajtshme pothuajse është rritur me pothuajse 22 herë.

Bazuar në metodologjitë e përdorur për matjen e investimeve të huaja, flukset e tyre vlerësohen me kursin e këmbimit mesatar të periudhës, ndërkohë që stoku vlerësohet me kursin e ditës së fundit të periudhës.

Sipas Bankës së Shqipërisë, rritja në stokun e investimeve nuk ka ardhur vetëm nga flukset e reja, por në të duhen llogaritur edhe ndryshimet nga kursi i këmbimit, ndryshimet nga çmimi dhe ndryshimet e tjera. Kjo nënkupton se stoku i investimeve të huaja rivlerësohet në mënyrë periodike, duke reflektuar edhe ndryshimin e çmimit të aseteve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.