Vjen kërkim falja nga Xhaka: Ju më njihni si një lojtar emocional, si dikush që nuk përmbahet dhe që jep gjithçka për ekipin në fushë
Futbollistin e kombëtares së Shqipërisë, Taulant Xhakën, nuk e mbajtën ndervat në ndeshjen e djeshme ku skuadra e tij, Basel-i, u mposht nga Zurich-u me rezultat 0:2 në ndeshjen e kampionatit zviceran.
Në fund të kësaj ndeshje, Xhaka u bë protagonist për të keq, kur fillimisht e kapi për fytyre një kundërshtar, pastaj më vonë edhe e goditi një tjetër në stilin e Zidane.
Megjithatë, nuk ka vonuar shumë dhe vetë Xhaka ka kërkuar falje për këtë gjest.
Përmes një postimi në profilin e tij në Instagram, futbollisti kosovar u ka kërkuar falje të gjithë futbolldashësve, duke e arsyetuar veprimin e tij se ishte i përfshirë nga emocionet.
View this post on Instagram
“Do të doja të përfitoj nga rasti për të kërkuar falje në çdo formë për ato që ndodhën në ditën e djeshme”, ka shkruar fillimisht Taulant Xhaka.
“Ju më njihni si një lojtar emocional. Si dikush që nuk përmbahet dhe që jep gjithçka për ekipin në fushë. Edhe ne lojtarët jemi njerëz prej mishi dhe gjaku që reagojmë emocionalisht në situata të caktuara”, shtoi futbollisti kuqezi.
“Në të njëjtën kohë, asnjë fyerje verbale në fushë, ndaj meje dhe familjes sime, nuk e justifikon një gafë të tillë nga ana ime”.
“Si lojtar me eksperiencë dhe kapiten i kësaj skuadre që kam një funksion të lartë, sidomos në momente të vështira, gjë që fatkeqësisht nuk e kam shfrytëzuar në këtë situatë”.
“Nuk mund ta zhbëj atë që ndodhi mbrëmë dhe sigurisht që do të përballem me pasojat për të mos e kontrolluar veten për një moment të shkurtër. Tauli juaj”, ka shkruar Xhaka në Instagram.
Pra, mesfushori kuqezi është i vetëdijshëm që mund ta marrë një dënim të ashpër na Federata Zvicerane e Futbollit.
Züri isch gfalle!
Tauli Forever ♥️💙 #rotblaulivepic.twitter.com/7JInl3iTrZ
— Birnweich Basler (@bireweich1893) May 7, 2023
Fillimisht për shkak të kartonit të kuq, ai do të mungojë dy ndeshjet e ardhshme, por dënimi mund të rritet.
Pasi e kapi kundërshtarin për fytyre, Xhaka fillimisht u ndëshkua me kartonin e dytë të verdhë dhe u përjashtua nga loja.
Por, gjyqtari e rishikoi momentin përmes sistemit VAR dhe e thirri Xhakën përsëri të kthehej në fushë, duke ia anuluar kartonin e verdhë dhe duke e ndëshkuar me të kuqin.
Pas këtij momenti, Xhaka ishte tejet i nervozuar, i cili më pas e goditi me kokë një kundërshtar, i cili e provokoi.
Kujtojmë që në këtë ndeshje u ndëshkua me karton të kuq edhe futbollisti i Kosovës, Mirlind Kryeziu, që luan për FC Zurich.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
