Vitia: Mjekët kosovarë i kanë pagat më të larta në Ballkanin Perëndimor

Sipas Odës së Mjekëve të Kosovës, 185 mjekë janë larguar nga Kosova gjatë vitit 2022 kryesisht në Gjermani, por ministri i Shëndetësisë, Arben Vitia thotë se kjo nuk ka ndodhur për shkak të pagave të ulëta, meqë sipas tij, mjekët kosovarë i kanë pagat më të larta në Ballkan Perëndimor.

“E para, nga viti i kaluar mjekët tash kanë një rrogë dinjitoze, nga rrogat më të larta që kanë mjekët në regjionin e Ballkanit Perëndimor. Në anën tjetër jemi duke investuar në çdo vend, janë katër klinika bosh në QKUK që janë para renovimit rrënjësor, për t’i përmirësuar kushtet dhe është duke punuar më të madhe në bllokun operativë, po bëhen sallat moderne në QKUK”, tha Vitia në një intervistë për Ekonomia Online.

Vitia ka theksuar se po bëhen investime në spitalet e përgjithshme, pasi ka theksuarës se një pjesë e madhe e problemeve edhe në Qendrën Klinike Universitare është sepse nuk ka pasur investime për një kohë shumë të gjatë në spitale të përgjithshme.

Ndërkaq dy vite më parë, kryeministri i Kosovës, Albin Kurti, pati thënë se fenomeni i largimit të mjekëve nga Kosova, nuk është ashtu siç po proklamohet me pompozitet nga disa individë.

Sipas tij, shifrat dhe përshtypja që po krijohet janë më të fryra se sa realiteti, kur fjala bie për largimin e profesionistëve shëndetësor.

“Nuk po them që ka mjek që nuk po shkojnë, mirëpo nuk mendoj që është në rregull që çdo e dyta fjali në shëndetësi të jetë për mjekët që po shkojnë sepse nuk reflekton realitetin”, kishte thënë Kurti në foltoren e Kuvendit të Kosovës.

Qeveria e Kosovës sipas të parit të ekzekutivit po angazhohet për t’i mbajtur punëtorët shëndetësorë në vendet e tyre të punës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.